މާފަންނު ސްޓޭޑިއަމް ސަރަހައްދުގައި އެކި ފަރާތްތަކުން ބޭނުންކުރަމުން އަންނަ ބިންތައް ހުސްކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިތުރު ހަތް ދުވަހުގެ ފުރުސަތެއް ދީފިއެވެ. އެ އިދާރާއިން މިގޮތަށް ނިންމީ، އެ ތަންތަން ހުސްކުރުމަށް ކުރިން ދިން 14 ދުވަހުގެ މުއްދަތު ހަމަވިއިރުވެސް ބިންތައް ހުސްކޮށްފައި ނުވާތީއެވެ. އެހެންކަމުން، އިއްޔެއިން ފެށިގެން ގުނާގޮތަށް ދީފައިވާ ހަތް ދުވަހުގެ މި މުއްދަތު ހަމަވުމަށްފަހު، އެ ބިންތަކުގައި ހުރި އެއްވެސް މުދަލަކަށް، އުޅަނދަކަށް ނުވަތަ ވަގުތީ އިމާރާތަކަށް ލިބޭ ގެއްލުމަކަށް އެފްއޭއެމުން ޒިންމާނުވާނެކަން އެ އިދާރާއިން ވަނީ ސަރުކާރުގެ ގެޒެޓު މެދުވެރިކޮށް އާންމުކޮށް އަންގާފައެވެ.

މި މައްސަލައިގައި ކަން ހިނގާފައިވާ ގޮތަށް ބަލާއިރު، އެފްއޭއެމްގެ މިހާރުގެ މެނޭޖްމަންޓަށް، އެ ބިންތައް ދޫކުރުމާ ގުޅޭ ރަސްމީ ލިޔެކިޔުންތަކެއް ނުވަތަ އެކަން ކުރުމަށް ފާސްކޮށްފައިވާ ނިންމުމެއް ފެންނާކަށް ނެތެވެ. އެހެންނަމަވެސް، އެ ބިންތަކުގައި ވިޔަފާރިއާއި އެނޫންވެސް މަސައްކަތްތައް ކުރަމުންދާ ފަރާތްތަކުން ބުނާ ގޮތުގައި އެފްއޭއެމްގެ ކުރީގެ މެނޭޖްމަންޓާއެކު ހަދާފައިވާ އެއްބަސްވުންތައް އެމީހުންގެ އަތުގައި އެބަހުއްޓެވެ. މިކަމާ ގުޅޭ ގިނަ މައްސަލަތަކެއް މިހާރުވެސް ކޯޓުތަކުގައި ކުރިއަށްދާއިރު، މި ބިންތައް ދޫކޮށްފައިވަނީ އެ އިދާރާގެ ގަވާއިދުތަކާ ޚިލާފަށް އަދި ހޯދަންޖެހޭ ހުއްދަތައް ނުހޯދައި ކަމަށް މިހާރުގެ މެނޭޖްމަންޓުން ފާހަގަކުރެއެވެ.

ފާހަގަކޮށްލެވޭ ގޮތުގައި މާފަންނު ސްޓޭޑިއަމްގެ މި ބިންތަކަކީ ފުޓްބޯޅަ ތަރައްޤީކުރުމުގެ ބޭނުމަށް ސަރުކާރުން 50 އަހަރުގެ މުއްދަތަށް އެފްއޭއެމްއާ ހަވާލުކޮށްފައިވާ ތަންތަނެވެ. އަދި އެ ސަރަހައްދުގައި ފުޓްބޯޅަ ދަނޑުތަކެއް އެޅުމަށް ދުނިޔޭގެ ފުޓްބޯޅައާ ބެހޭ މައި އިދާރާ (ފީފާ) އިން މާލީ އެހީތެރިކަން ފޯރުކޮށްދީފައިވީ ނަމަވެސް، އެ ފައިސާއަށް ވީނުވީއެއް ނޭނގި، ދަނޑުތައް އެޅިފައިނުވާކަން ފާހަގަކުރެވެއެވެ.