ރާއްޖޭގެ ފަތުރުވެރިކަމުގެ ސިނާއަތަށް ލިބެމުންދާ ކުރިއެރުމާއެކު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދެ ލައްކަ ފަހަނަޅައި، މިދިޔަ އަހަރާ އަޅާބަލާއިރު ފަތުރުވެރިކަން ކުރިއަރައިފި ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ. އެ މިނިސްޓްރީން އާންމުކޮށްފައިވާ މައުލޫމާތުތަކަށް ބަލާއިރު، ބުދަ ދުވަހުގެ ނިޔަލަށް ރާއްޖެއަށް ޖުމްލަ 200،801 ފަތުރުވެރިން ވަނީ ޒިޔާރަތްކޮށްފައެވެ. މިއީ ފާއިތުވި 2023 ވަނަ އަހަރުގެ މި މުއްދަތުގައި ޒިޔާރަތްކުރި 193،174 ފަތުރުވެރިންނާ އަޅާކިޔާއިރު 3.9 އިންސައްތައިގެ އިތުރުވުމެކެވެ. ތަފާސްހިސާބުތައް ދައްކާގޮތުން މިއަހަރުގެ މިހާތަނަށް އެވަރެޖްކޮށް ދުވާލެއްގެ މައްޗަށް 7،171 ފަތުރުވެރިން ރާއްޖެ އައިސްފައިވެއެވެ.

ވަކިވަކި މާކެޓްތަކަށް ބަލާއިރު، ރާއްޖެއަށް މިހާރު އެންމެ ގިނަ ފަތުރުވެރިން ޒިޔާރަތްކުރަނީ ރަޝިއާއިންނެވެ. އެގޮތުން ރަޝިއާއިން 26،965 ފަތުރުވެރިން އައިސްފައިވާއިރު، ދެވަނައަށް އެންމެ ގިނަ ފަތުރުވެރިން އައި އިޓަލީން 21،137 ފަތުރުވެރިން އަދި ތިންވަނައިގައި އޮތް ޗައިނާއިން 18،531 ފަތުރުވެރިން ވަނީ ރާއްޖެ އައިސްފައެވެ. މީގެއިތުރުން ގަދަ ދިހައެއްގައި ހިމެނޭ އެހެން ގައުމުތަކަށް ބަލާއިރު އިނގިރޭސިވިލާތް، ޖަރުމަނު، އިންޑިއާ، ފްރާންސް، އެމެރިކާ، ޕޮލެންޑް އަދި ކަޒަކިސްތާން ހިމެނެއެވެ. މީގެ ތެރެއިން އިންޑިއާ މިވަގުތު އޮތީ 7،564 ފަތުރުވެރިންނާއެކު ލިސްޓުގެ ހަވަނައިގައެވެ.

ފަތުރުވެރިން ރާއްޖެއަށް އެތެރެވެފައިވާ މައި ދޮރާށިތަކަށް ބަލާއިރު، ގިނަ ފަތުރުވެރިން ރާއްޖެ އައިސްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ. އެއީ 198،329 ފަތުރުވެރިންނެވެ. މީގެ އިތުރުން ސަރަހައްދީ އެއާޕޯޓުތަކުގެ ތެރެއިން މާފަރު އެއާޕޯޓުން 714 ފަތުރުވެރިން، ގަން އެއާޕޯޓުން 599 ފަތުރުވެރިން އަދި ހަނިމާދޫ އެއާޕޯޓުން 563 ފަތުރުވެރިން ރާއްޖެ އެތެރެވެފައިވެއެވެ. ހަމައެއާއެކު މާމިގިލި އެއާޕޯޓުން 359 ފަތުރުވެރިންނާއި ދާލު އެއާޕޯޓުން 237 ފަތުރުވެރިން ވެސް ރާއްޖެ އައިސްފައިވާކަން ތަފާސްހިސާބުތަކުން އެނގެއެވެ.

ރާއްޖެ އައި ފަތުރުވެރިން ޗުއްޓީ ހޭދަކުރުމަށް ޚިޔާރުކޮށްފައިވާ ތަންތަނަށް ބަލާއިރު، އެންމެ ބޮޑު މަގުބޫލުކަމެއް ލިބިފައިވަނީ ރިސޯޓުތަކަށެވެ. އެގޮތުން 138،166 ފަތުރުވެރިން ރިސޯޓުތަކުގައި ޗުއްޓީ ހޭދަކޮށްފައިވާއިރު، ގެސްޓްހައުސްތަކަށް 52،984 ފަތުރުވެރިން އަދި ހޮޓާތަކަށް 5،358 ފަތުރުވެރިން ޒިޔާރަތްކޮށްފައިވެއެވެ. އަދި ސަފާރީ އުޅަނދުތަކުގައި 4،112 ފަތުރުވެރިން ވަނީ ވަގުތު ހޭދަކޮށްފައެވެ. މިވަގުތު ރާއްޖޭގައި ފަތުރުވެރިންނަށް ޚިދުމަތް ދިނުމަށް 179 ރިސޯޓާއި، 899 ގެސްޓްހައުސްގެ އިތުރުން 173 ސަފާރީ އުޅަނދާއި 16 ޓޫރިސްޓް ހޮޓާ އޮޕަރޭޓް ކުރަމުންދާއިރު، މި ހުރިހާ ތަނެއްގައި ޖުމްލަ 66،854 އެނދު ފަތުރުވެރިންނަށް ޚިދުމަތް ދިނުމަށް ތައްޔާރުކުރެވިފައިވާކަމަށް ޓޫރިޒަމް މިނިސްޓްރީން ހާމަކުރެއެވެ.