ރާއްޖެއާއި އިންޑިއާއާ ދެ ޤައުމުގެ ރައްޔިތުންގެ މަންފާއަށްޓަކައި އެކުގައި ކުރާ މަސައްކަތް ކުރިއަށް ގެންދާނެކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތުގައި، އެ ޤައުމުގެ ރައީސް ދްރައުޕަތީ މުރްމުއަށާއި، އިންޑިއާގެ ބޮޑުވަޒީރު ނަރެންދުރަ މޯދީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި ތަހުނިޔާގެ ސިޓީފުޅާ ގުޅިގެން ދިވެހި ބަހުން “އެކްސް” ގައި ކުރެއްވި ޕޯސްޓެއްގައެވެ.
ރައީސް ޑރ. މުޢިއްޒުއަށް ޝުކުރު އަދާކުރައްވައި އިންޑިއާގެ 77 ވަނަ ޖުމްހޫރީ ދުވަހުގެ މުނާސަބަތާ ގުޅިގެން އަރިސްކުރެއްވި ތަހުނިޔާއާއި ހެޔޮއެދުންތައް އިހުތިރާމާއިއެކު ބަލައިގަންނަކަން ބޮޑުވަޒީރު މޯދީ ވަނީ ހާމަކުރައްވާފައެވެ.
އަދި ދެ ޤައުމުގެ ރައްޔިތުންގެ މަންފާއަށްޓަކައި ދެ ގައުމު އެކުގައި ކުރާ މަސައްކަތް ކުރިއަށް ގެންދާނެކަމަށް މޯދީ ވިދާޅުވިއެވެ. މޯދީގެ ޕޯސްޓު ނިންމަވާލެއްވީ ދިވެހި ރައްޔިތުންނަށް އުފާފާގަތި ދުވަސްތަކަކަށް އެދެމުންނެވެ.
ކޮންމެ އަހަރެއްގެ ޖަނަވަރީ މަހުގެ 26 ވަނަ ދުވަސް، އިންޑިއާގެ ޖުމްހޫރީ ދުވަހުގެ ގޮތުގައި ފާހަގަކުރަނީ، 1950 ވަނަ އަހަރު، އެ ޤައުމުގެ ޤާނޫނު އަސާސީ ތަންފީޒުކޮށް، ޖުމްހޫރިއްޔަތަކަށް ބަދަލުވުމުގެ މުނާސަބަތާ ގުޅުވައިގެންނެވެ. މި ދުވަހަކީ އިންޑިއާގެ ފުރަތަމަ ރައީސް ޑރ. ރަޖެންދްރާ ޕްރަސާދު މަގާމުގެ ހުވާކުރެއްވި ދުވަސްވެސް މެއެވެ.
ކިޔުންތެރިންގެ ހިޔާލު