އެސްޓީއޯގެ ފާރމަސީތައް ސަރުކާރުގެ ބޭސް ކުންފުނި “ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް”ގެ ދަށަށް ބަދަލު ކުރުމަށް ނިންމައިފިއެވެ.
މި ކުންފުންޏަކީ، ދިވެހި ސަރުކާރުގެ ސައްތައިންސައްތަ ޙިއްސާ އެކުލެވިގެންވާ، ސަރުކާރުގެ ކުންފުންޏެކެވެ.
ޕީއެސްއެމްނިއުސްއަށް މައުލޫމާތު ދެއްވަމުން އެސްޓީއޯއިން ވިދާޅުވީ، އެސްޓީއޯގެ ފާރމަސީތައް ސަރުކާރުގެ ބޭސް ކުންފުނީގެ ދަށަށް ބަދަލު ކުރުމަށް ނިންމާ އެކަމުގެ މަސައްކަތް ފަށާފައިވާ ކަމަށެވެ. އަދި އެކި މަރުހަލާތަކަށް ބަހާލައިގެން އެ މަސައްކަތް ކުރާއިރު އަންނަ މަހުގެ 15ގެ ނިޔަލަށް ފާރމަސީތައް ބަދަލުކޮށް ނިމޭނެ ކަމަށް އެސްޓީއޯއިން ވިދާޅުވިއެވެ. މިމަސައްކަތުގެ ދަށުން އެސްޓީއޯގެ 190 އަށްވުރެ ގިނަ ފާރމަސީ ބަދަލު ކުރުމަށް ވަނީ ނިންމާފައެވެ.
ކުންފުނީގެ ޤާނޫނުގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުން “ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް” ގެ ނަމުގައި ރައީސުލްޖުމްހޫރިއްޔާ ސަރުކާރުގެ ކުންފުންޏެއް އުފައްދަވާފައިވަނީ، މިދިޔަ އަހަރުގެ ސެޕްޓެމްބަރ މަހުގެ 9 ވަނަ ދުވަހުއެވެ.
މިއީ ޑޮކްޓަރީ ބޭހާއި، މެޑިކަލް ކޮންޒިއުމަބަލްސްއާއި، މެޑިކަލް އިކުއިޕްމަންޓް ގަނޑުކޮށް ގަނެ ދިވެހިރާއްޖެއަށް އެތެރެ ކުރުމުގެ މަސައްކަތް ފުޅާކޮށް، އެތަކެތި ރާއްޖޭގެ އެކި ހިސާބުތަކަށް ފޯރުކޮށްދިނުމުގެ އެންމެހައި މަސައްކަތް ކުރުމުގެ މަޤުސަދުގައި އުފައްދަވާފައިވާ ކުންފުންޏެކެވެ.
ބޭހުގެ މައްސަލަ ޙައްލު ކުރުމުގެ ގޮތުން ބޭހުގެ ސަޕްލައިވެސް ވަނީ ހަރުދަނާކޮށްފައެވެ. ރާއްޖެއަށް ބޭސް އެެތެރެކުރާ މިންވަރު އެތަށް ގުނައެއް އިތުރުކޮށްފައިވާއިރު، މީގެ ކުރިން އެސްޓީއޯއިން އެތެރެ ކުރި 200 އެއްހާ ބޭސް މިހާރު ވަނީ 800އާއި 900 ދެމެދަށް އިތުރުކޮށްފައެވެ.
ކިޔުންތެރިންގެ ހިޔާލު