އުންމީދުކުރި ވަރަށް ވުރެ ބޮޑަށް ފާއިތުވި ދެ އަހަރުގެ ތެރޭގައި ރައީސް ޑރ. މުހައްމަދު މުއިއްޒު ޚިދުމަތް ކޮށްދެއްވާފައިވާ ކަމަށް ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހީމް ފަލާހު ވިދާޅުވެއްޖެއެވެ.
ސަރުކާރަށް ދެ އަހަރު ފުރުން ފާހަގަކުރުމަށް ޕީއެންސީން މިރޭ އެ ޕާޓީގެ ހަރުގޭގައި ބޭއްވި ހަފުލާގައި ފަލާހު ވިދާޅުވީ، ރައީސް މުއިއްޒަކީ މި ގައުމަށް ލިބިފައި ހުރި ޖަވާހިރެއް ކަމަށެވެ. އަދި އެމަނިކުފާނުގެ ވެރިކަމުގެ ފުރަތަމަ ދެ އަހަރުގެ ތެރޭގައި ރައްޔިތުން އުންމީދު ކުރި ވަރަށްވުރެ ފުރިހަމައަށް ޚިދުމަތްކޮށްދެއްވާފައިވާ ކަމަށް އޭނާ ވިދާޅުވިއެވެ.
“އުންމީދުކުރި ވަރަށް ވުރެ ފުރިހަމައަށް މި ދެ އަހަރު ރައީސް މުއިއްޒު ޚިދުމަތްކޮށްދެއްވައިފި” ފަލާހު ވިދާޅުވިއެވެ.
އިނގުރައިދޫ ދާއިރާގެ މެންބަރު ފަލާހު ވިދާޅުވީ ރައްޔިތުންގެ ކަންބޮޑުވުންތައް އަޑުއައްސަވައި އެކަންކަން ރައީސް މުއިއްޒު ހައްލުކޮށްދެއްވަމުން އަންނަ ކަމަށެވެ.
ކުރުމުއްދަތެއްގެ ތެރޭގައި ރާއްޖޭގެ ހުރިހާ ރަށަކަށް ވަޑައިގެން ތަރައްގީގެ މަޝްރޫއުތަކެއް ފައްޓަވާދެއްވާފައިވާކަން ވެސް އޭނާ ފާހަގަކުރެއްވިއެވެ.
މި ހަފުލާގައި ވަނީ ސަރުކާރަށް ދެ އަހަރު ފުރުން ފާހަގަކުރުމަށް ކޭކެއް ފަޅާފައެވެ. އޭގެއިތުރަށް، މި ހަފުލާގައި ޕީއެންސީގެ ޗެއާޕާސަން އަދި މަޖިލީހުގެ ރައީސް އަބްދުއްރަޙީމް އަބްދުﷲގެ އިތުރުން އެ ޕާޓީގެ އިސްވެރިން ބައިވެރިވެވަޑައިގެންނެވިއެވެ.
ކިޔުންތެރިންގެ ހިޔާލު