ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި, ށ. ފޭދޫ ކައުންސިލްގެ ކުރީގެ ރައީސާއި އޭނާގެ އަނބިމީހާ ހައްޔަރުކޮށްފިއެވެ.

ފުލުހުން ބުނީ، ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން، ކޯޓު އަމުރެއްގެ ދަށުން މިދިޔަ ބުދަ ދުވަހު ފޭދޫގެ ގެއެއް ބަލައިފާސްކުރި ކަމަށެވެ.

އެ ގެއިން މަސްތުވާތަކެތި ކަމަށް ބެލެވޭ އެއްޗެއް ހުރި ދެ ކަރުދާސްކޮޅާއެކު، ދެ މީހަކު ހައްޔަރުކުރި ކަމަށް ފުލުހުން ބުންޏެވެ.

އެ ދެމީހުންނަކީ ށ. ފޭދޫ، ސައިމާގޭ، މުހައްމަދު މުސްތަފާ އާއި އެރަށު ލައިޓް ހައުސް ފާތިމަތު ނާއިލާއެވެ. ފޭދޫ ކައުންސިލްގެ ރައީސް ކަމަށް މުސްތަފާ އިންތިހާބުވީ 2017 ވަނަ އަހަރުއެވެ.

އެ ދެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން، މުސްތަފާ 15 ދުވަހަށް ބަންދު ކުރުމަށް ވަނީ އަމުރުކޮށްފަ އެވެ. އަދި އޭނާގެ އަންހެނުން ބަންދުކުރީ ހަތް ދުވަހަށެވެ.