ފެނަކަ ކޯޕަރޭޝަނުގެ މެނޭޖިން ޑިރެކްޓަރަކަށް އަހުމަދު ސައީދު ހުންނެވި އިރު އެކޯޕަރޭޝަނަށް މުދަލާއި ހިދުމަތް ހޯދަން އޭނާގެ އާއިލީ ތިން ކުންފުންޏަކަށް ޖުމްލަ 49.7 މިލިޔަން ރުފިޔާގެ ކޮންޓްރެކްޓް ދީފައިވާކަން ހާމަވެއްޖެއެވެ.

މިކަން ހާމަވީ އޮޑިޓް އޮފީހުން ނެރެފައިވާ ފެނަކަ ކޯޕަރޭޝަންގެ ޚާއްސަ އޮޑިޓް ރިޕޯޓުންނެވެ.

ސައީދުގެ އާއިލީ ތިން ކުންފުންޏަކާ އެކު މުދަލާ ހިދުމަތް ހޯދުމުގެ 92 އެއްބަސްވުމެއް، 2021-2023އާ ދެމެދު ހެދި ކަމަށް އޮޑިޓް ރިޕޯޓްގައިވެ އެވެ.

އެއީ ޝެލްޓާ ހޯލްޑިންގްސް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއި ޕަަވަރޭ އިންވެސްޓްމެންޓް ޕްރައިވެޓް ލިމިޓެޑް ނަމަކަށް ކިޔާ ކުންފުންޏަކާއި ކޮރަލް އިންވެސްޓްމެންޓް ޕްރައިވެޓް ލިމިޓެޑް ނަަމަކަށް ކިޔާ ކުންފުންޏެކެވެ.

އޮޑިޓް ރިޕޯޓްގައިވާ ގޮތުން މީގެ ތެރެއިން ދެ ކުންފުންޏަކީ ސައީދުގެ ޅިޔަނުންގެ ކުންފުނިތަކެވެ. އަދި އަނެއް ކުންފުންޏަކީ ޅިޔަނެއްގެ ދަރިއެއްގެ ކުންފުންޏެކެވެ.

ޝެލްޓާ ހޯލްޑިންގްސް ޕްރައިވެޓް ލިމިޓެޑް

އޮޑިޓް ރިޕޯޓްގައި ބުނި ގޮތުގައި އެ ކުންފުންޏަށް ފެނަކައިން 84 އެއްބަސްވުމެއްގެ ދަށުން 22.2 މިލިޔަން ރުފިޔާގެ މަސައްކަތް ހަވާލުކޮށްފައިވެ އެވެ. ބިޑަކާ ނުލައި ދިން އެ މަސައްކަތްތަކަށް 16.4 މިލިޔަން ރުފިޔާ ދޫކޮށްފަައިވާ ކަން ވެސް އޮޑިޓުން ހާމަވެއެވެ.

ޕަަވަރޭ އިންވެސްޓްމެންޓް ޕްރައިވެޓް ލިމިޓެޑް

އެ ކުންފުންޏަށް ހަ އެއްބަސްވުމެއްގެ ދަށުން 15.7 މިލިޔަން ރުފިޔާގެ މަސައްކަތް ހަވާލުކުރި ކަމަށް އެ ރިޕޯޓްގައިވެ އެވެ. އޭގެ ތެރެއިން 10.1 މިލިޔަން ރުފިޔާ ވަނީ ދޫކޮށްފައިވާކަން އެ ރިޕޯޓުން ހާމަވެ އެވެ.

ކޮރަލް އިންވެސްޓްމެންޓް ޕްރައިވެޓް ލިމިޓެޑް

އިންޖީނުގެއަކާއި އޮފީސް އިމާރާތެއް އެޅުމުގެ މަސައްކަތް ކުރަން އެ ކުންފުންޏާ އެކު ސޮއިކުރި ދެ އެއްބަސްވުމުގެ އަގު 11.6 މިލިޔަން ރުފިޔާ އަށް އަރަ އެވެ. އޭގެ ތެރެއިން 4.5 މިލިޔަން ރުފިޔާ ދޫކޮށްފައިވާކަން އޮޑިޓް ރިޕޯޓުން ހާމަވެ އެވެ.

އެ ތިން ކުންފުންޏަށް ދޫކުރި ފައިސާގެ ޖުމްލަ އަކީ 31.1 މިލިޔަން ރުފިޔާ އެވެ.