ކޮޅުމަޑުލު ކިނބިދޫއާއި ވޭމަންޑޫ ކޯޒްވޭއަކުން ގުޅާލެވުމުން އިޤްތިޞާދީގޮތުން ބޮޑެތި ކުރިއެރުންތަކެއް ކިނބިދޫއާއި މުޅި އަތޮޅަށްވެސް އަންނާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ކިނިބިދޫގެ ރައްޔިތުންނާ ބައްދަލުކުރައްވައި ރަށުގެ ތަރައްޤީއަށް ކުރިއަށް ރާއްވަވާފައިވާ މަސައްކަތްތަކާ ގުޅޭ މަޢުލޫމާތު ޙިއްސާކުރައްވަމުންނެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ އެމަނިކުފާނު ވަޢުދުވެވަޑައިގެންނެވި ގޮތަށް ކިނބިދޫ- ވޭމަންޑް ކޯޒްވޭގެ މަސައްކަތް ޙަޤީގަތަކަށް ހައްދަވައިދެއްވާނެކަމަށެވެ. މިމަހުގެ 22 ވަނަ ދުވަހު މިމަޝްރޫޢަށް ޝައުގުވެރިކަން ފާޅުކުރުމަށް ހުޅުވާލާފައިވާއިރު، މިހާރުވެސް އިންވެސްޓަރުން ޝަޢުވެރިކަން ފާޅުކުރަމުން އަންނަކަމަށް ރައީސް ވިދާޅުވިއެވެ. މިމަޝްރޫޢު ކުރިއަށްގެންދާނީ ކޮންޓްރެކްޓަރ ފައިނޭންސް އުސޫލުން، އިންޓަރގްރޭޓެޑް ޓުއަރިޒަމް މަޝްރޫޢާއެކުއެވެ.

“ކޯޒްވޭއާއެކު ބޮޑެތި ތަރައްޤީތަކެއް އަންނާނެ. މި މަޝްރޫޢު ހަގީގަތުގައިވެސް ފުއްދައިދޭނެކަމުގެ ޔަގީންކަން ދެން. ސަރަޙައްދީ ތަރައްގީގެ ވަރަށް މުހިންމު މަޝްރޫޢަކަށް މި މަޝްރޫޢުވެގެންދާނެ.” ރައީސް

ރައީސް ވިދާޅުވީ އަންނަ އަހަރު ނިމުމުގެ ކުރިން ތ.އަތޮޅުގައި 1 ރިސޯޓް ހުޅުވާނެކަމަށް އިންވެސްޓަރު މަޢުލޫމާތުދީފައިވާކަމަށެވެ.

އަދި ކިނބިދޫގައި ފެށި ޒުވާނުންގެ މަރުކަޒު ތަރައްޤީކުރުމާއި، ފުލުހުންގެ މަރުކަޒާއި، މަގުހެދުމުގެ މަސައްކަތަކީ ރަށަށް ބޮޑެތި ތަރައްޤީތައް އަންނާނެ މަޝްރޫޢުތަކެއްކަން ފާހަގަކުރެއްވިއެވެ. ރައީސް ވިދާޅުވީ ޞިއްޙީ މަރުކަޒު ތަރައްޤީކުރުމުގެ މަސައްކަތް މިހާރަށްވުރެ އަވަސްކޮށް ކުރިއަށް ގެންދިއުމަށް، މިމަޝްރޫޢު މިހާރު ހަވާލުކޮށްފައިވާ ކުންފުންޏާއެކު މަސައްކަތްކުރައްވާނެކަމަށެވެ.

މީގެއިތުރުން ކުޅިވަރު ފެސިލިޓީ ތަރައްޤީކުރުމުގެ މަސައްކަތުގެދަށުން، ފުޓުބޯޅަ ދަނޑު ވަށައި ފެންސްޖެހުމާއި، ލައިޓް ހަރުކޮށް ސިޑިބަރިއާއި، ޗޭންޖިން ރޫމް ހިމެނޭހެން ފުޓްސަލް ދަނޑުގެ ޓާފު ބަދަލުކޮށް ތަރައްގީކުރައްވާނެކަމަށެވެ. އަދި ދަނޑު ތަރައްީކުރާނީ ހޭންޑްބޯލްވެސް ކުޅެވޭގޮތަށްކަމަށެވެ. އެ މަސައްކަތް ހަވާލުކޮށް، ދެ މަސްތެރޭ ފަށްޓަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.