ކޮންމެ ފުލުހަކީ ވެސް ނަޒާހާތްތެރިކަމާއެކު މަސައްކަތްކުރާ ފުލުހަކަށް ވާންޖެހޭ ކަމަށް ހޯމް މިނިސްޓަރު އަލީ އިހްސާން ވިދާޅުވެއްޖެއެވެ.

ފުލުހުންގެ 40 ވަނަ އަސާސީ ތަމްރީން ކޯސް ފުރިހަމަކުރި ފުލުހުންގެ ދަސްވެނިވުމަށް ރޭ ދ. ވާނީގައި ބޭއްވި ރަސްމިއްޔާތުގައި އިހުސާން ވިދާޅުވީ ފުލުހުންގެ ޔުނިފޯމާއި އަބުރާއި އިއްޒަތާއި ކަރާމާތް ގަންނަން އެކި ފަހަރުމަތިން މީހުން އުޅެފައިވާ ކަމަށެވެ.

“މިފަދަ ހާލަތްތަކުގައި އެފަދަ ކަންކަމަށް ނޫނެކޭ ބުނެ، ފުލުހުންގެ އިންޓެގްރިޓީ [ނަޒާހަތްތެރިކަން] ހިފަހައްޓައި، ފުލުހުންގެ މުއައްސަސާގެ ކަރާމާތް ހިފަހައްޓައި އަދި ކޮންމެ ފުލުހަކީ އެ މީހެއްގެ ވާޖިބުގައި ފުރިހަމައަށް ހުރި ފުލުހެއްކަން ރަމްޒު ކޮށްދިނުމަކީ މިއަދު ތިބޭފުޅުންނަށް އޮންނާނެ ޗެލެންޖެއް،” އިހްސާން ވިދާޅުވިއެވެ.

މިނިސްޓަރު ވިދާޅުވީ ފުލުހުންގެ ވާޖިބު އަދާކުރަން ވާނީ އިންސާނީ ހައްގުތަކަށް ހުރަސްނޭޅޭ ގޮތަށް ކަމަށާއި ފުލުހުން ވާން ޖެހޭނީ ރައްޔިތުންނަށް އިހުތިރާމާއި ގަދަރު ދޭ ބަޔަކަށް ކަމަށެވެ.

މީހަކު ކުށަށް އަރައިގަންނަ ހާލަތުގައި ނުވަތަ ގާނޫނާ ހިލާފުވާ ހާލަތުގައި ވެސް، ފުލުހުންގެ ގާނޫނީ ދައުރު އަދާކުރަން ވާނީ، އެ މީހަކަށް ލިބިގެންވާ އިންސާނީ ހައްގާއި ކަރާމާތަށް ހުރުމަތްތެރިކޮށް ހިތައިގެން ކަމަށް އިހުސާން ވިދާޅުވިއެވެ.

އިހްސާންގެ ވާހަކަފުޅުގައި ފުލުހުންގެ ޚިދުމަތުގެ ފެންވަރު ރަނގަޅުކުރުމަށް ކުރަމުން އަންނަ މަސައްކަތްތަކުގެ މައްޗަށް އަލިއަޅުވައިލެއްވި އެވެ. އެގޮތުން ރާއްޖޭގެ ކޮންމެ ރަށެއްގައި ޕޮލިސް ސްޓޭޝަނެއް ގާއިމްކުރަން ރައީސް ޑރ. މުހައްމަދު މުއިއްޒު ނިންމެވީ ފުލުހުންގެ އިންފްރާސްޓްރަކްޗަރު ވަރުގަދަކޮށް އަދި ދޭ ހިދުމަތުގެ ފެންވަރު ރަނގަޅުކޮށް، ރައްޔިތުންނާ ގާތުން ހިދުމަތް ދޭ ބަޔަކަށް ހެދުމުގެ މަގުސަދުގައި ކަމަށް ވިދާޅުވިއެވެ.