ގައުމީ ބޭންކް، ބީއެމްއެލްގެ ސްޓޫޑެންޓް ކާޑަށް އެދި ހުށަހަޅައިގެން ޖުމްލަ އެއް ލައްކަ ރުފިޔާ ލިބޭ ޕްރޮމޯޝަނެއް މިއަދު ފަށައިފިއެވެ.
ބީއެމްއެލުން ބުނީ، މިއަދުން ފެށިގެން ދޮޅު މަސް ދުވަހުގެ މުއްދަތަކަށް ކުރިއަށްދާ މި ޕްރޮމޯޝަންގައި، ސްޓޫޑެންޓް ކާޑަށް އެދި ހުށަހަޅާ ފަރާތްތަކުގެ ތެރެއިން 100 ނަސީބުވެރިއަކަށް 1،000 ރުފިޔާ ލިބޭނެ ކަމަށެވެ.
އެ ބޭންކުން ބުނީ، ފައިސާ ޚަރަދުކުރުމުގައި ޒިންމާދާރު ގޮތަކަށް ކުޑަކުދިން އަހުލުވެރިކުރުވައި، މާލީ މިނިވަންކަން ދަސްކޮށްދިނުމުގެ ބޭނުމުގައި ފަރުމާކޮށްފައިވާ މި ކާޑު، ހަތް އަހަރުން މަތީގެ ދަރިވަރުންނަށް ލިބޭނެ ކަމަށެވެ. އަދި ދަރިވަރުންގެ ބެލެނިވެރިންނަށް މި ކާޑާ ގުޅިފައިވާ އެކައުންޓަށް ފައިސާ ފޮނުވައި، ފައިސާ ބޭނުންކުރާ ގޮތް ބެލޭނެ ކަމަށެވެ.
ވިސާ ޑެބިޓުގެ ގޮތުގައި ދޫކުރާ މި ކާޑަށް އެއްވެސް ފީއެއް ނުނަގާނެ ކަމަށާއި، މި ކާޑު ރާއްޖެއާއި ރާއްޖޭން ބޭރުގައި ބޭނުންކުރެވޭނެ ކަމަށް، ބީއެމްއެލުން ބުންޏެވެ.
އަދި ދަރިވަރުން އަހަރެއްގެ ތެރޭ ކާޑުން ކުރާ މުއާމަލާތްތަކުގެ 0.5 ޕަސެންޓު އެ ކުދިންގެ ސޭވިން އެކައުންޓުތަކަށް ޖަމާކޮށްދޭނެ ކަމަށާއި، އެ ކާޑުން ބީއެމްއެލްގެ ޕީއޯއެސް މެޝިންތައް މެދުވެރިކޮށް ފައިސާ ދެއްކުމުން އެކި ފިހާރަތަކާއި ރެސްޓޯރަންޓު ފަދަ ތަންތަނުން ޑިސްކައުންޓް ލިބޭނެ ކަމަށް ވެސް ބޭންކުން މީގެ ކުރިން ބުނެފައިވެއެވެ.
ބީއެމްއެމްއެލް މޮބައިލް ބޭންކިން އެޕްލިކޭޝަން މެދުވެރިކޮށް މި ކާޑަށް އެދި ހުށަހަޅޭނެއެވެ.
ބީއެމްއެލުން މި ކާޑު ތައާރަފްކުރީ މިދިޔަ މޭ މަހުގެ 10 ވަނަ ދުވަހު ކުޑަކުދިންގެ ދުވަހާ ގުޅުވައިގެންނެވެ. މި ކާޑު ދޫކުރަނީ އުމުރުން ހަތް އަހަރާއި 17 އަހަރާ ދެމެދުގެ ދަރިވަރުންނަށެވެ.
ކިޔުންތެރިންގެ ހިޔާލު