މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މާލޭ ނޯތު ހާބަރުގެ ޚިދުމަތްތައް ފުޅާކޮށް، މަސްވެރިންނަށް ބޭނުންވާ އަސާސީ ޚިދުމަތްތައް ހެޔޮ އަގެއްގައި ފޯރުކޮށްދިނުމަށް އިންތިޒާމުތައް ހަމަޖައްސަމުން ދާކަމަށް އެ ކުންފުނިން މަޢުލޫމާތު ދީފިއެވެ.

މި އައު ބަދަލުތަކާއެކު، ކުރިން 32-34 އުޅަނދު އެޅޭވަރުގެ ޖާގަ އޮތް ނޯތު ހާބަރުގައި 99 އުޅަނދު އެޅޭވަރުގެ ޖާގަ ތަނަވަސްކޮށްދީފައިވާކަމަށް އެމްޕީއެލްއިން ބުނެއެވެ. މީގެ އިތުރުން، މަސްވެރިންނަށް ބޭނުންވާ މުހިންމު ޚިދުމަތްތަކުގެ ތެރޭގައި ހިމެނޭ ފެން، ކަރަންޓު، ތެޔޮ އަދި އައިސް ލިބޭނެ އިންތިޒާމުތައްވެސް އެ ސަރަހައްދުން ހަމަޖެހިގެންދާނެއެވެ.

މަސްމާރުކޭޓު ސަރަހައްދާއި އެ ސަރަހައްދުގެ ކުރިމަތީގައި އޮންނަ ލޯކަލް މާރުކޭޓުގެ ހުރަސްތޮށްޓާ ހަމައަށް ހިމެނޭހެން މިހާރު މާލޭގެ ވިޔަފާރި ބަނދަރާއި ނޯތު ހާބަރު ސަރަހައްދު ބަލަހައްޓަން ފަށާފައި ވަނީ އެމްޕީއެލުންނެވެ. އެމްޕީއެލްއަށް މި ސަރަހައްދު ދީފައިވަނީ މިދިޔަ ޖޫންމަހުގެ ތެރޭގައެވެ. މާލޭ ނޯތު ހާބަރު ސަރަޙައްދު ބޮޑުކުރުމާއެކު އެމްޕީއެލްއިން ދަނީ އަލަށް އިތުރުވި ސަރަހައްދަށް ގެންނަންޖެހޭ ބަދަލުތަް ގެނަސް ޚިދުމަތްތައް ފުޅާ ކުރަމުންނެވެ.

އެމްޕީއެލްއިން މިހާރު ބަލަހައްޓަމުންދަނީ މަސްމާރުކޭޓު ސަރަހައްދާއި ލޯކަލް މާރުކޭޓުގެ ހުރަސްތޮށްޓާ ހަމައަށް ހިމެނޭ ސަރަހައްދެވެ. މި ސަރަހައްދުގައި މަސްވެރިންނަށް ބޭނުންވާ އަސާސީ ވަސީލަތްތައް ޤާއިމްކުރުމުގެ މަސައްކަތް ދަނީ ކުރިއަށެވެ.

އެމްޕީއެލްއިން ބުނިގޮތުގައި މި އައު ޚިދުމަތްތައް ރަސްމީކޮށް ފެށުމަށް ވަނީ އަންނަ މަހަށް ރޭވިފައެވެ. މިއީ މަސްވެރިންނަށް ލުއިފަސޭހަ ގޮތްތަކެއް ފޯރުކޮށްދިނުމަށް އެޅޭ މުހިންމު ފިޔަވަޅެއްކަމަށް އެ ފަރާތުން ފާހަގަކުރެއެވެ.