ހުސްވެފައިވާ ހައިކޯޓުގެ ދެ ފަނޑިޔާރުންގެ މަގާމަށް މުހައްމަދު ޝަހީދާއި އަބްދުﷲ ޖަމީލް މޫސާ އައްޔަންކުރަން ފާސްކޮށްފި އެވެ.
ޖޭއެސްސީ އިން ބުނީ ހައި ކޯޓަށް އައްޔަން ކުރަން ނިންމީ، ޏ. ފުވައްމުލައް ދޫޑިގަން، ގޯލްޑަންގޭޓް، މުހައްމަދު ޝަހީދު އާއި ލ. މާވަށް ނަލަމަލަ، އަބްދުﷲ ޖަމީލް މޫސާ ކަމަށެވެ.
އެ ދެ ބޭފުޅުންގެ ތެރެއިން ޖަމީލަކީ ސިވިލް ކޯޓުގެ ގާޒީކަން ކުރިން ކުރެއްވި ބޭފުޅެކެވެ.
ހައިކޯޓުގެ ފަނޑިޔާރުކަން ހުސްވީ އެ ކޯޓުގެ ދެ ފަނޑިޔާރުން ކަމަށްވާ މުހައްމަދު ސަލީމާއި މުހައްމަދު ޝަހީދު ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރުމުންނެވެ.
ހުސްވެފައިވާ މަގާމްތަކަށް ފަނޑިޔާރުން އައްޔަންކުރުމުގެ މަސައްކަތް ޖޭއެސްސީން އަންނީ ކުރަމުންނެވެ. އެގޮތުން އުއްތަމަ ފަނޑިޔާރު ކަމަށް ބޭފުޅަކު އައްޔަންކުރުމަށް ކުރިމަތިލުމުގެ ފުރުސަތު ހުޅުވާލުމުން ތިން ބޭފުޅަކު ވަނީ ކުރިމަތިލައްވާފަ އެވެ. އުއްތަމަ ފަނޑިޔާރު ކަމަށް އައްޔަންކުރަން ފެނިވަޑައިގަންނަވާ ނަމެއް ރައްޔިތުންގެ މަޖިލީހަށް ފޮނުވާނީ ރައީސުލްޖުމްހޫރިއްޔާއެވެ.
ކިޔުންތެރިންގެ ހިޔާލު