ސްރީ ލަންކާއަށް ބޭސްފަރުވާއަށް ދާ ދިވެހީންނަށާއި، އެ ގައުމުގައި ކިޔެވުމަށާއި ވަޒީފާ އަދާކުރުމަށް އުޅޭ ދިވެހީންގެ އަނބިން ނުވަތަ ފިރިންނަށް އެއް އަހަރު ދުވަހުގެ ވިސާ ދިނުމަށް އެ ގައުމުން ނިންމައިފިކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވެފައިވަނީ، މިވަގުތު ރާއްޖޭގައި ހުންނެވި ސްރީ ލަންކާގެ ރައީސް އަނޫރާ ކުމާރާ ޑިސަނަޔަކައާއެކު ދެއްވި ނޫސްވެރިންގެ ބައްދަލުވުމުގައެވެ. މި ނިންމުމާ ގުޅިގެން ރައީސް މުއިއްޒު ވަނީ ލަންކާގެ ރައީސަށް ޝުކުރު އަދާކުރައްވާފައެވެ.

ދެ ގައުމުގެ ވެރިންގެ ބައްދަލުވުމުގައި ވިޔަފާރިއާއި، ތައުލީމާއި، ދިފާއީ ދާއިރާއާއި، ވޮކޭޝަނަލް ތަމްރީނާއި، ޒުވާނުންނާ ގުޅުން ހުރި ކަންކަމާއި، މަސްވެރިކަމާއި، ދަނޑުވެރިކަމުގެ ދާއިރާއާ ގުޅޭ މަޝްވަރާތައް ކުރެވުނު ކަމަށް ރައީސް މުއިއްޒު ވިދާޅުވިއެވެ. އަދި މި މަޝްވަރާތަކާއި އެއްބަސްވުންތަކުގެ ސަބަބުން ދެ ގައުމުގެ ގުޅުން އިތުރަށް ހަރުދަނާވެގެންދާނެ ކަމަށްވެސް އެމަނިކުފާނު ވިދާޅުވިއެވެ.

މި ބައްދަލުވުމުގައި ދެ ގައުމުގެ މެދުގައި ދެ އެއްބަސްވުމެއްގައި ސޮއިކުރެވުނެވެ. އެގޮތުން ޖިނާއީ ކުށްތައް ހުއްޓުވުމަށް ސޮއިކުރެވުނު އެއްބަސްވުމާއި، ފޮރިން ސާވިސްގައި މަސައްކަތްކުރާ ޒުވާނުންނަށް ތަމްރީނު ދިނުމާ ގުޅޭ އެމްއޯޔޫގައި ސޮއިކުރެވުނެވެ.

ފާހަގަކޮށްލެވޭ ގޮތުގައި ރާއްޖެއާއި ސްރީ ލަންކާއާ ދެމެދު ސިޔާސީ ގުޅުން ގާއިމުކުރެވުނީ 1965 ވަނަ އަހަރުގެ ޖުލައި 26 ގައެވެ. އެހެންކަމުން މި އަހަރަކީ ދެ ގައުމުގެ ގުޅުމަށް 60 އަހަރު ފުރޭ އަހަރެވެ. މިއީ މިދިޔަ އަހަރުގެ ސެޕްޓެންބަރު މަހު ވެރިކަމާ ހަވާލުވެވަޑައިގަތުމަށްފަހު ރައީސް ޑިސަނަޔަކަ ރާއްޖެއަށް ކުރައްވާ ފުރަތަމަ ދަތުރުފުޅެވެ.