އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ދެ ދުވަހުގެ ފުރަމާނަ ދަތުރުފުޅު ނިންމަވައިލެއްވުމަށްފަހު މިއަދު ފުރާވަޑައިގެންފިއެވެ.
ރައީސް ޑރ. މުހައްމަދު މުއިއްޒުގެ ދައުވަތަކަށް ދެ ދުވަހުގެ ޒިޔާރަތެއްގައި މޯދީ ރާއްޖެއަށް ވަޑައިގަތީ ޖުލައި 25 ބަނަ ދުވަހުއެވެ. އެ ދުވަހު އެމަނިކުފާނު ރާއްޖެއަށް ވަޑައިގަތުމުން ވެލާނާ އިންޓަނޭޝަނަލް އެއާޕޯޓުން މަރުހަބާ ވިދާޅުވީ ރައީސް މުއިއްޒެވެ.
އެއަށްފަހު 25 ވަނަ ދުވަހު ހަވީރު މޯދީ މާލެއަށް ވަޑައިގަތުމުން ރަސްމީކޮށް ހޫނު މަރުހަބާއެއް މާލެއިން ދަންނަވާފައިވެއެވެ. އަދި 21 ބަޑީގެ ސަލާމެއް އެރުވިއެވެ. އަދި އެއަށްފަހު ރައީސް އޮފީހުގައި އިންޑިޔާއާއި ރާއްޖޭގެ މެދުގައި ރަސްމީ މަޝްވަރާތައް ކުރިއަށްގެންދިޔައެވެ.
އެ މަޝްވަރާތަކަށްފަހު ރައީސާއި މޯދީ ބައިވެރިވެވަޑައިގެންނެވި ރަސްމިއްޔާތެއްގައި އިންޑިއާ އާއި ރާއްޖޭގެ މެދުގައި މުހިއްމު އަށް އެއްބަސްވުމެއްގައި ސޮއިކޮށްފައިވެއެވެ.
އެގޮތުން ދިވެހިރާއްޖެއާއި އިންޑިއާގެ މެދުގައި މިނިވަން ވިޔަފާރީގެ އެއްބަސްވުމެއް ގާއިމުކުރުމުގެ ރަސްމީ މަޝްވަރާތައް ފެށުމާ ގުޅޭ އެއްބަސްވުމަކާއި، 565 މިލިއަން ޑޮލަރުގެ ލައިން އޮފް ކްރެޑިޓެއް ހަމަޖެއްސުމުގެ އެއްބަސްވުމެއްގައި ސޮއިކޮށްފައިވެއެވެ.
އަދި އިންޑިޔާއިން ރާއްޖެއަށް ފޯރުކޮށްދޭ ކަރަންސީ ސްވޮޕް ފެސިލިޓީއާ ގުޅޭ ފަހުމުނާމާގައިވެސް ދެ ގައުމުން ސޮއިކުރިއެވެ. އޭގެ އިތުރަށް މަސްވެރިކަމާއި އެކުއަކަލްޗާގެ ދާއިރާއިން ދެ ގައުމުގެ މެދުގައި އެއްބާރުލުން ދިނުމުގެ އެއްބަސްވުމެއްގައި ވެސް ސޮއިކުރެވުނެވެ.
ކިޔުންތެރިންގެ ހިޔާލު