ގައުމީ ލޯބި ކުރިމަތީގައި ސިޔާސީ އޮއިވަރަކީ އެއްވެސް މާނައެއް ހުރި އެއްޗެއް ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ނ. އަތޮޅުގެ ރަށްތަކަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން ވެލިދުއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ރައީސް މިރޭ ވިދާޅުވީ ގައުމު ދެކެ ލޯބިވުމަކީ ކޮބައިކަން އޭގެ ފުރިހަަމަ މާނައިގައި ޅަ ދަރިންނަށް ކިޔައިދޭން ކަމަށެވެ.
އެކަން ކުރެވޭނީ އަމިއްލަ ކަންކަމަށްވުރެ ބޮޑަށް ގައުމު އިސްކުރި ދުވަހަކުން ކަމަށާއި ސިޔާސީ އޮއިވަރު އެއީ ގައުމީ ލޯބި ކުރިމަތީގައި އެއްވެސް މާނައެއް ހުރި އެއްޗެއް ނޫން ކަމަށެވެ. އަދި ދިވެހީން އިސްކުރަންވީ ގައުމު ކަމަށް އެ މަނިކުފާނު ވިދާޅުވިއެވެ.
ރައީސް ވިދާޅުވީ ދިވެހިން އިސްކުރަންޖެހޭނީ ދިވެހިވަންތަކަން، އިސްލާމްދީން، ދިވެހި ބަސް، އަމިއްލަވަންތަކަން އަދި ގައުމިއްޔަތު ކަމަށާއި އެކަން އިސްކޮށްގެން ނޫނިއްޔާ ކިތަންމެ އެއާޕޯޓެއް ހެދިޔަސް، ކިތަންމެ ބަނދަރެއް ހެދިޔަސް، ކިތަންމެ މަގެއް ހެދިޔަސް، ސްކޫލެއް ހެދިޔަސް، ހޮސްޕިޓަލެއް ހެދިޔަސް ހަގީގީ ތަރައްގީއެއް ނާންނާނެ ކަމަށެވެ.
ވަށާޖެހޭ ތަރައްގީއެއް އަންނާނީ އެ ތަރައްގީ އަމިއްލަ ނަފުސާ ހިސާބުން ގެންނަން ފަށައިގެން ކަމަށާއި އަމިއްލަ ނަފުސަށް ގެންނަ ތަރައްގީއަކީ ސަރުކާރުން ހިންގާ މަޝްރޫއަކުން ގެނެވޭނެ ތަރައްގީއެއް ނޫން ކަމަށް އެ މަނިކުފާނު ވިދާޅުވިއެވެ.
ކިޔުންތެރިންގެ ހިޔާލު