ބީއެމްއެލްއާ ގުޅޭގޮތުން ފަތުރަމުންދާ ވާހަކަތައް އެ ބޭންކުން ދޮގުކޮށްފިއެވެ.

ބީއެމްއެލް އިން އެސްޑީއެފްސީ ގަތުމުގެ ކަންކަން ކުރިއަށްގެންދަނީ ގާނޫނާ ޚިލާފަށް ކަމަށް ބުނެ ބައެއް ފަރާތްތަކުން އަންނަނީ ވާހަކަތައް ފަތުރަމުންނެވެ.

މިކަމާ ގުޅޭގޮތުން އެ ބޭންކުން މިރޭ ބުނީ އެސްޑީއެފްސީ ގަތުމުގެ މުއާމަލާތް ކުރިއަށްގެންދަނީ ރާއްޖޭގެ ބޭންކިން ގާނޫނާއި ގަވާއިދުތާއި ހެދިފައިވާ އެންމެހައި އުސޫލުތަކާ އެއްގޮތްވާގޮތުގެމަތިން ކަމަށެވެ.

މިކަމާ ގުޅޭގޮތުން މަރުކަޒީ ބޭންކު، އެމްއެމްއޭ އިން ބުނީ ބީއެމްއެލް އިން އެ އޮތޯރީޓިއަށް ހިއްސާކޮށްފައިވާ މައުލޫމާތަށް ބަލާއިރު، އެ ވިޔަފާރީގެ މުއާމަލާތުގެ ހުރިހާކަމެއްވެސް ކުރިއަށް ގެންދާނީ ކަމާގުޅޭ ގާނޫނުތަކާއި، ގަވާއިދުތަކުގެ އިތުރުން އިޖުރާއަތްތަކާ އެއްގޮތްވާ ގޮތުގެ މަތީންކަމަށް ބީއެމްއެލްއިން ޔަގީންކޮށްދީފައިވާ ކަމަށެވެ.

ބީއެމްއެލް އިން ބުނީ އެސްޑީއެފްސީ ގަތުމަށްފަހު މިހާރު ދެމުންދާ ވަރަށް ވުރެ ގިނައިން ކުދި އަދި މެދުފަންތީގެ ވިޔަފާރިތަކަށް ލޯނު ދޫކުރާނެ ކަމަށެވެ. އަދި ފައިދާގެ ޕަސެންޓަށް އެއްވެސް ބަދަލެއް ނުގެންނާނެ ކަމަށް އެ ބޭނުން ބުންޏެވެ.

މީގެއިތުރުން އެ ލޯނުތައް ދޫކުރާނީ އިސްމީ ޝަރީއަތުގެ ހަމަތަކުގެ މަތިން ކަމަށް ވެސް ބީއެމްއެލް އިން ބުންޏެވެ.