މި މަހުގެ 11 ވަނަ ދުވަހުގެ ރޭ މާލެއިން ގެއްލުނު ގ. ގާނެޓް، ހަސަން ޔާމީން، ރާއްޖެއިންް ބޭރަށް ފުރާފައިނުވާކަން ކަށަވަރުކުރެވިފައިވާ ކަމަށް ފުލުހުން ބުނެފިއެވެ.
ހަސަން ޔާމީން ގެއްލިގެން އާއިލާއިން ފުލުހުންނަށް ރިޕޯޓްކުރީ މި މަހުގެ 14 ވަނަ ދުވަހުގެ ރެއެވެ.
ފުލުހުން މިއަދު ނެރުނު ބަޔާނެއްގައި ވަނީ އޭނާ ގެއްލިފައިވާކަން ރިޕޯޓް ކުރުމާއެކު ގެއްލިގެން ހޯދާ މީހުންގެ މައުލޫމާތު ފުރިހަމަކޮށް ފުލުހުންގެ ގުޅުންހުރި ބަހާތަކަށާއި އެހެނިހެން މުއައްސަސާތަކަށް އެ މައުލޫމާތު ފޯރުކޮށްދީފައިވާނެ ކަމަށެވެ. އަދި ތަހުގީގުގެ މަސައްކަތް ފަށައި އަޅަންޖެހޭ ފިޔަވަޅުތައް އަޅާފައިވާނެ ކަމަށް އެ ބަޔާނުގައިވެއެވެ.
ފުލުހުން ބުނީ އެ މައްސަލައާ ގުޅިގެން ގިނަ އަދަދެއްގެ ސީސީޓީވީ ފްޓޭޖް ދިރާސާކުރަމުން އަންނަ ކަމަށެވެ.
އާއިލާގެ އެއްބާރުލުމާއެކު އޭނާ ދިރިއުޅޭ ތަން ބަލައި ފާސްކުރިއިރު، ތުހުމަތު ކުރެވޭ އެއްވެސް ކަމެއް ނުވަތަ ކުށުގެ އަމަލެއް ހިންގާފައިވާ ކަމުގެ އެއްވެސް ނިޝާނެއް ފެނިފައިނުވާ ކަމަށް ވެސް ފުލުހުން ބުންޏެވެ.
އެޕާޓްމަންޓަށް އެއްވެސް ބަދަލެއް އައިކަން ފާހަގަކުރެވިފައެއްނުވާ ކަމަށް ވެސް އެ ބަޔާނުގައިވެއެވެ.
ހަސަން ޔާމީނާ ގުޅޭ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން ނަންބަރު 3322111 ނުވަތަ ހެންވޭރު ޕޮލިސް ސްޓޭޝަންގެ ނަންބަރު 9400053 އަށް ގުޅައި އެ މައުލޫމާތު ހިއްސާކޮށްދިނުމަށް ފުލުހުން ވަނީ އެދިފައެވެ.
ކިޔުންތެރިންގެ ހިޔާލު