މޫދުގެ ހާދިސާތަކުގައި، 2020 އިން ފެށިގެން މިދިޔަ އަހަރުގެ އޮކްޓޫބަރު މަހުގެ ނިޔަލަށް 112 ފަތުރުވެރިން މަރުވެފައިވާ ކަމަށް ފުލުހުން ބުނެފިއެވެ.
ރައްޔިތުންގެ މަޖިލީހާ ފުލުހުން އެ މައުލޫމާތު ހިއްސާކުރީ، މޫދުގެ ހާދިސާތަކުގައި މިދިޔަ ހަތަރު އަހަރު މަރުވެފައިވާ ފަތުުރުވެރިންގެ އަދަދެއް ހޯދަން ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް، މިދިޔަ އަހަރުގެ ނޮވެމްބަރު ފުލުހުންނަށް ފޮނުވާފައިވާ ސިޓީއަކާ ގުޅިގެންނެވެ.
އެ ސިޓީގައިވާ ގޮތުން އެންމެ ގިނަ އަދަދެއްގެ ފަތުރުވެރިން މަރުވެފައިވަނީ މިދިޔަ އަހަރުއެވެ. މިދިޔަ އަހަރުގެ އޮކްޓޯބަރުގެ ނިޔަލަށް 34 ފަތުރުވެރިން މޫދުގެ ހާދިސާތަކުގައި މަރުވެފައިވާ ކަމަށް ތަފާސް ހިސާބުތަކުން ދައްކައެވެ.
މިިދިޔަ ހަތަރު އަހަރު އެންމެ ގިނަ ފަތުުރުވެރިން މަރުވެފައިވަނީ ގެނބިގެންނެވެ. ޖުމުލަ 68 ފަތުރުވެރިން ގެނބިގެން މަރުވެފައިވާ އިރު، މިދިޔަ އަހަރު އެކަނިވެސް 21 ފަތުރުވެރިން ވަނީ ގެނބިގެން މަރުވެފައެވެ. އޭގެ އިތުރުން ޑައިވިން ނުވަތަ ސްނޯކްލިންއަށް ގޮސް އުޅެނިކޮށް 42 ފަތުރުވެރިން ވަނީ މަރުވެފައެވެ.
ތަފާސްހިސާބުތަކުން ދައްކާގޮތުގައި ސްނޯކްލިން ނުވަތަ ޑައިވިނަށް ގޮސް އުޅެނިކޮށް ކަނޑުގައި ދުއްވާ އުޅަނދެއްގައި ޖެހިގެން ނުވަ މީހަކަށް އަނިޔާވެ އެކަކު ވަނީ މަރުވެފައެވެ.
މިދިޔަ ހަތަރު އަހަރު ފަތުރުވެރިން މަރުވި އަދަދު:
2020 – 9 މީހުން
2021 – 19 މީހުން
2022 – 22 މީހުން
2023 – 28 މީހުން
2024 އޮކްޓޯބަރު މަހުގެ ނިޔަލަށް – 34 މީހުން
ކިޔުންތެރިންގެ ހިޔާލު