ނެޓްފްލިކްސް އިން މުޅިން އަލަށް ސްޓްރީމް ކުރަން ފެށި ޝޯ، “އޯލް ދަ ޝާކްސް”ގެ ފުރަތަމަ އެޕިސޯޑު ފުވައްމުލަކު ސިޓީގެ މަޝްހޫރު “ޝާކް ޕޮއިންޓް” އަށް ހާއްސަކޮށްފިއެވެ.

މުޅި ދުނިޔެއަށް ވެސް މަޝްހޫރު ފުވައްމުލަކުގެ “ޝާކް ޕޮއިންޓް” އަކީ މިހާރު ދުނިޔޭގައި ފެމުނުމިޔަރުގެ އެންމެ ބޮޑު އާބާދީއެއް އޮތް ތަނެކެވެ. އެކަމާ ގުޅިގެން އެ ޕޮއިންޓު ވެގެން ގޮސްފައިވަނީ ފަތުރުވެރިންނަށް ވަރަށް މަގުބޫލު ތަނަކަށެވެ.

ނެޓްފްލިކްސް އިން އިއްޔެ ފެށި “އޯލް ދަ ޝާކްސް”ގެ ފުރަތަމަ އެޕިސޯޑުގައި ފުވައްމުލަކު “ޝާކް ޕޮއިންޓް”ގެ މަންޒަރުތަކުގެ އިތުރުން، ރަށުގެ ރީތި ގޮނޑުދޮށް ހިމެނޭހެން ފުވައްމުލަކުގެ ހިތްގައިމު މަންޒަރުތައް ދައްކާލިއެވެ.

ފުވައްމުލަކު ސިޓީގެ މޭޔަރު އިސްމާއިލް ރަފީގު ފޭސްބުކްގައި ކުރެއްވި ޕޯސްޓެއްގައި ވިދާޅުވީ މިއީ އެ ރަށް އިޝްތިހާރުވުމަށް ލިބުނު ވަރަށް ބޮޑު ފުރުސަތެއް ކަމަށެވެ. އަދި އެ ޝޯގައި ފުވައްމުލަކު ފީޗާކުރުމުގައި އިސް މަސައްކަތެއް ކުރި އަހުމަދު އިނާހުއަށް މޭޔަރު ޝުކުރު އަދާކުރެއްވިއެވެ.

ޑައިވިންގެ ދާއިރާގައި 17 އަހަރަށްވުރެ ގިނަ ދުވަހު މަސައްކަތްކޮށްފައިވާ އިނާހަކީ ފުވައްމުލަކުގައި އެންމެ ފުޅާ ދާއިރާއެއްގައި ޑައިވިންގެ ހިދުމަތްދޭ “ޕެލަޖިކް ޑައިވާސް”ގެ ވެރިޔާއެވެ.

ނެޓްފްލިކްސްގެ “އޯލް ދަ ޝާކްސް”އަކީ މިޔަރުގެ ފޮޓޯ ނެގުމުގެ މުބާރާތެއް ދައްކާ ޝޯއެކެވެ. އެ މުބާރާތުން މޮޅުވާ ޓީމަށް 50،000 ޑޮލަރުގެ އިނާމެއް ވަނީ ކަނޑައަޅައިފައެވެ. ނަމަވެސް އިނާމެއްގެ ގޮތުގައި ލިބޭ އެ ފައިސާ ޗެރިޓީއަކަށް ހަދިޔާކުރަން ޖެހެއެވެ.