މީހަކު ރަހީނުކޮށް، އަނިޔާކުރި މައްސަލައިގެ ތުހުމަތުގައި ހައްޔަރުކުރި މީހާ ޝަރީއަތް ނިމެންދެން ބަންދުކޮށްފިއެވެ.

އެ މައްސަލައާ ގުޅިގެން ހައްޔަރުކޮށްފައިވަނީ ސ. ފޭދޫ، ސުވާސާގޭ، އިބްރާހިމް ސައީދު (48އ) އެވެ.

ފުލުހުން އިއްޔެ ބުނީ މާލޭ ގެއެއްގައި ހުއްދަ ނޫން ގޮތުގައި 44 އަހަރުގެ މީހަކު ހިފަހައްޓައި، އަނިޔާކުރާ ކަމަށް ތުހުމަތުކުރެވޭ މައްސަލައެއް މިދިޔަ ބުދަ ދުވަހު ރިޕޯޓްކޮށްފައިވާ ކަމަށެވެ.

އެ ރިޕޯޓާ ގުޅިގެން އެ މައްސަލަ ތަހުގީގު ކުރުމަށް ކުރި މަސައްކަތުން، އަނިޔާ ލިބުނު މީހާ ހުރިތަން ހޯދުމަށްފަހު، އެ މީހާ ވަނީ ސަލާމަތްކޮށްފައެވެ. ފުލުހުން، އިބްރާހިމް ސައީދު ހައްޔަރުކުރީ ކުށުގެ ވެށިންނެވެ.

ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ އިބްރާހިމް ސައީދުގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކޮށްފައިވާ ކަމަށެވެ.