މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް)ގެ ސާވަރުތަކަށް ގެއްލުން ދިނުމުގެ މައްސަލައެއްގައި ވަގުތީގޮތުން މަސައްކަތުން ދުރުކުރެވިފައިވާ އެ ތަނުގެ އައިޓީ އޮފިސަރު އަޙްމަދުޙްމަދު ފަޒީލް، މަޤާމުން ވަކިކޮށްފިއެވެ.

މިދިޔަ މެއި މަހުގެ 22 ވަނަ ދުވަހުން ފެށިގެން 7 ދުވަހުގެ މުއްދަތަށް ފަޒީލށް ފަޒީލް ހުރީ ވަގުތީގޮތުން މަސައްކަތުން ދުރުކުރެވިފައެވެ.

އޭނާ ވަގުތީގޮތުން މަސައްކަތުން ދުރުކުރުމުގެ އެއް ދުވަސް ކުރިން ބްރޯޑްކޮމްގެ ސާވަރަށް މައްސަލައެއް ދިމާވުމާ ގުޅިގެން، އެ ކޮމިޝަނުން އެ މައްސަލަ ދިރާސާކުރުމަށްފަހު ދިވެހި ފުލުހުންގެ ޚިދުމަތުގެ ތަޙުޤީޤަކަށް ބްރޯޑްކޮމުން އެދުނެވެ.

ބްރޯޑްކޮމްގެ ރައީސް ސޮފާ ޝަފީޤް “ވަން” އަށް މިއަދު ވިދާޅުވީ އެ މައްސަލަ ތަޙުޤީޤުކުރުމަށްފަހު ފުލުހުންގެ ހޯދުންތައް މިދިޔަ ހޯމަ ދުވަހު ރަސްމީ ލިޔުމަކުން ކޮމިޝަނަށް އަންގާފައިވާ ކަމަށެވެ.

“ފުލުހުން 23 ޖޫން 2023 ވަނަ ދުވަހު އަޅުގަނޑުމެންނަށް ފޮނުވި ސިޓީގައި އެބަވޭ އެ ބޭފުޅުންގެ ތަޙުޤީޤަށް އެ މައްސަލައިގައި ލިބިފައިވާ ހެއްކާއި ޤަރީނާއަށް ބަލާއިރު، އެ މައްސަލައިގައި ހިމެނޭ ޢަމަލަކީ ގަސްދުގައި، ގެއްލުމެއް ދިނުމަށް ކޮށްފައިވާ ޢަމަލެއް ކަމަށް،” ސޮފާ

ސޮފާ ވިދާޅުވީ އެހެންކަމުން، ވަޒީފާއާބެހޭ ޤާނޫނުގެ 23 ވަނަ މާއްދާގެ (ށ) ގެ 1 ވަނަ ނަންބަރާ ޙަވާލާދީ، ނޯޓިސް ދިނުމަކާ ނުލައި ފަޒީލް އިއްޔެގެ ވަގުތެއްގައި ވަޒީފާއިން ވަކިކޮށްފައިވާ ކަމަށެވެ.

ވަޒީފާއާބެހޭ ޤާނޫނުގެ 23 ވަނަ މާއްދާގެ (ށ) ގެ 1 ވަނަ ނަންބަރުގައި ބަޔާންކޮށްފައިވަނީ މުވައްޒަފެއްގެ ޢަމަލެއްގެ ސަބަބުން ވަޒީފާ އަދާކުރާ ތަނަށް ނުރައްކަލެއް ނުވަތަ ގެއްލުމެއް ލިބިފައިވާނަމަ، ނޯޓިސް ދިނުމަކާ ނުލައި ވަޒީފާއިން ވަކިކުރުމުގެ އިޚްތިޔާރު ވަޒީފާދޭ ފަރާތަށް ލިބިގެންވާ ކަމަށެވެ.