މިދިޔަ ހޯމަ ދުވަހު އަވަހާރަވި، ދީނީ އިލްމުވެރިޔާ އަލްމަރުހޫމް ޝައިޚް އިބްރާހިމް ފަރީދު އަޙްމަދުގެ އަޑުފުޅުން ރެކޯޑުކުރެވިފައިވާ އައްމާ ފޮތް ޢާންމުކޮށް ދޫކޮށްފިއެވެ.

އިލްމު.އެމްވީން މިއަދު ހާމަކުރި ގޮތުގައި މި ރެކޯޑިންގ ރައްކާކުރެވިފައި އޮތްތާ 10 އަހަރަށްވުރެ ގިނަ ދުވަސްވެއްޖެއެވެ. ޝައިޚް ފަރީދުގެ އަވަހާރަވުމާ ގުޅިގެން، އެ މަރުޙޫމަށް ޞަދަޤާތެއްގެ ގޮތުގައި މި ރެކޯޑިންގ އަޑުއެހޭނެ ލިންކެއް ވަނީ ޙިއްޞާކޮށްފައެވެ. ލިންކު

ދީނީ އިލްމު ފެތުރުމާއި ދަޢުވަތު ދިނުމުގައި އުމުރުފުޅުގެ ގިނަ ދުވަސްތަކެއް ހޭދަކުރެއްވި ޝައިޚް ފަރީދު އަވަހާރަވީ ހޯމަ ދުވަހު މެލޭޝިއާއަށް ވަޑައިގަތްތަނާ ހާޓް އެޓޭކެއް ޖެހިވަޑައިގަތީ އެއަރޕޯޓުގައެވެ. އެ މަރުޙޫމްގެ ޖަނާޒާ މިއަދު މެންދުރު ނަމާދަށްފަހު މެލޭޝިއާގައި ވަނީ އަދާކޮށްފައެވެ.

އަންނަ ހުކުރު ދުވަހު ރާއްޖޭގެ ހުރިހާ މިސްކިތެއްގައި ޝައިޚް ފަރީދުގެ މައްޗަށް ޣާއިބު ކަށު ނަމާދު ކުރުން އޮންނާނެއެވެ. ޝައިޚް ފަރީދުގެ ހަނދާނުގައި ބަންގްލަދޭޝްގައި އަދި ރާއްޖޭގައި ވެސް މިސްކިތެއް ބިނާކުރުމަށް ޚިދުމަތް ޖަމްޢިއްޔާއިން ވަނީ ނިންމާފައެވެ.

އެ މަޝްރޫޢަށް ބޭނުންވާ ފަންޑު ހޯދުމަށް ހުޅުވާލިތާ 24 ގަޑިއިރު ވެސް ނުވަނީސް އަންދާޒާކުރި އަދަދު ވަނީ ހަމަވެފައެވެ. އެ ފަންޑަށް އަދިވެސް ދަނީ އެހީތައް ލިބެމުންނެވެ. އަދި ގިނަ ފަރާތްތަކުން އެ ފަންޑަށް ފައިސާ ޖަމާކުރަމުންދާ ކަމަށާއި، ބަންގްލަދޭޝްގައި މިސްކިތް ބިނާކުރުމަށް ބޭނުންވާ ވަރަށްވުރެ އިތުރަށް ފައިސާ ލިބެމުންދާތީ، ރާއްޖޭގައި ވެސް މިސްކިތެއް ބިނާކުރުމަށް ނިންމީ ކަމަށް އެ ޖަމްޢިއްޔާއިން ވަނީ ހާމަކޮށްފައެވެ.

ޝައިޚް ފަރީދުގެ އަވަހާރަވުމާ ގުޅިގެން ގިނަ ފަރާތްތަކުން ވަނީ ހިތާމަ ފާޅުކޮށް، އެ މަރުޙޫމްގެ ޚިދުމަތްތައް ފާހަގަކޮށްފައެވެ. އަދި އެ މަރުޙޫމްގެ އިލްމީ އަދި ދަޢުވަތުގެ މަސައްކަތްތައް ދެމެހެއްޓުމަށް ގިނަ ފަރާތްތަކުން ގޮވާލާފައިވެއެވެ.