ރައްޔިތުން ބަރޯސާވެވޭ ތަނަކަށް ކައުންސިލްތައް ހަދަން ޖެހޭ ކަމަށް ލޯކަލް ގަވަރުމަންޓް މިނިސްޓަރު އާދަމް ޝަރީފް ވިދާޅުވެއްޖެއެވެ.

ޕީއެސްއެމްއަށް ދެއްވި އިންޓަވިޔުއެއްގައި މިނިސްޓަރު ވިދާޅުވީ، ކައުންސިލްތަކާއި ސަރުކާރާ އޮންނަ ގުޅުން ރަނގަޅުކޮށް ލާމަރުކަޒީ ނިޒާމުގެ ހިންގުން ހަރުދަނާ ކުރުމަކީ ސަރުކާރުން ހާއްސަ އިސްކަމެއްދޭ ކަމެއް ކަމަށެވެ.

މިނިސްޓަރު ވިދާޅުވީ ލޯކަލް ގަވަރުމަންޓް މިނިސްޓްރީގެ މައިގަނޑު މަސައްކަތަކީ ސަރުކާރާއި ކައުންސިލްތަކާ ދެމެދު މެދުވެރިއެއްގެ ރޯލު އަދާކުރުން ކަމަށާއި މިހާތަނަށް އައިއިރު ވުޒާރާގެ ހިންގުމުގެ މުހިންމު އުސޫލުތައް ހެދި އަމަލުކުރަން ފެށިފައިވާ ކަމަށެވެ.

“ކައުންސިލްތަކަށް ލިބޭ އިހްތިސޯސްގެ ތެރޭގައި ކަންކަން ކުރެވޭނެ ފުރުސަތުތަކާއި އެކަންކަން ކުރާނެ ގޮތްތަކެއް ކަނޑައެޅިފައި އޮތުމަކީ ވަރަށް މުހިންމު ކަމެއް. ރައްޔިތުން އިތުބާރުކުރާ ރައްޔިތުންނަށް ބާރޯސާވެވޭ ބަޔަކަށް ކައުންސިލްތައް ހަދަން ޖެހޭ، އެކަމަށްޓަކައި ލާމަރުކަޒީ ގާނޫނަށްވެސް ބަދަލުތަކެއް އަންނަން ޖެހޭ.” މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ، މިނިސްޓްރީން ކުރިއަށް އޮތް ތަނުގައި އެންމެ އިސްކަމެއްދޭނީ ކައުންސިލުން ދެމުން އަންނަ ހިދުމަތްތައް ފުޅާކޮށް އެ ކައުންސިލްތަކަކީ ރައްޔިތުންގެ ބަސް އިއްވައިދޭ އިދާރާތަކަށް ހެދުމުގެ މަސައްކަތް ކަމަށެވެ.

ސަރުކާރުން އަންނަނީ، ކައުންސިލް އިދާރާތަކުގެ ފެންވަރު ރަނގަޅު ކުރުމަށް ބޮޑު މަޝްރޫއެއް ހިންގަމުންނެވެ. އެގޮތުން ޗައިނާ ސަރުކާރުގެ އެހީގައި 50 ކައުންސިލެއް ތަރައްގީ ކުރުމުގެ މަސައްކަތް ކުރަމުންދާއިރު، ސަރުކާރު ހަރަދުގައި 55 ކައުންސިލް އިދާރާއެއް އަންނަނީ ތަރައްގީކުރަމުންނެވެ.