ޒަޔަނިސްޓު އިސްރާއީލުން ޣައްޒާއަށް ދެމުންގެންދާ ހަމަލާތަކަށް 600 ދުވަސް ވެގެން ގޮސްފައިވާއިރު، ހަމަލާތައް ހުއްޓާލާނެ ކަމުގެ އެއްވެސް އަލާމާތެއް އަދި ނެތެވެ.

ޣައްޒާއަށް ދޭ ހަމަލާތައް މިހާރުވަނީ އެތައްގުނަ އިތުރުކޮށް ފުޅާކޮށްފައެވެ. އެގޮތުން، އަސްކަރީ ޖެޓާއި، ޑްރޯން ބޭނުންކޮށްގެން ވައިގެމަގުން ބޮންއަޅައި މިސައިލުން ހަމަލާ ދެމުންގެންދާއިރު، އެއްގަމުމަގުން ބޮޑުބަޑީގެ ހަމަލާދީ އަދި ބަޑިޖަހައި ކޮންމެ ދުވަހަކު އެތައްބަޔަކު ގެންދަނީ ދުނިޔެއިން ނައްތާލަމުންނެވެ.

ހަމަލާދީ، ގެތަކާއި، އާންމުން ދިރިއުޅޭ އިމާރާތްތައް ގެންދަނީ ބިމާހަމަކުރަމުންނެވެ. ޣައްޒާގެ އެތައް ރަށެއް މިހާރު އޮތީ އެއްވެސް ދިރުމެއްނެތި ނާމާން ރަށްތަކެއްގެ ގޮތުގައެވެ.

2023 ވަނަ އަހަރުގެ އޮކްޓޯބަރު މަހުން ފެށިގެން ޒަޔަނިސްޓު ސިފައިން ޣައްޒާއަށް ދެމުންގެންދާ ހަމަލާތަކަށް 600 ދުވަސް ފުރިގެން ދިޔައިރު، ޝަހީދުވި ކަމަށް ރެކޯޑް ކުރެވުނު މީހުންގެ ރަސްމީ އަދަދު މިހާރުވަނީ 54،084 އަށް އަރާފައެވެ.

މީގެތެރޭގައި 18،000 އަށްވުރެ ގިނަ ކުޑަކުދިން ހިމެނޭއިރު، 12،400 އަންހެނުން ހިމެނެއެވެ. އޭގެތެރެއިންވެސް 7،950 މީހުންނަކީ މައިންނެވެ.

މައިންބަފައިން ޝަހީދުކޮށްލުމުގެ ސަބަބުން ޣައްޒާއިން 42،000 އަށްވުރެ ގިނަ ކުދިންވަނީ ޔަތީމުވެފައެވެ. 14،700 މީހުންވަނީ ހުވަފަތްވެފައެވެ.

ހަމަލާދީ ޣައްޒާގެ 2،483 އާއިލާއެއްގެ ހުރިހާ މެމްބަރުން ޝަހީދުކޮށްލާފައި ވެއެވެ.

ވައްޓާލާފައިވާ ގެތަކާއި، އިމާރާތްތަކުގެ ދަށުވެ ގެއްލިފައިވާ މީހުންގެ އަދަދު 9،000 އަށްވުރެ ގިނައެވެ.

ޒަޔަނިސްޓުންގެ ހަމަލާތަކުގައި ޒަޚަމްވި މީހުންގެ އަދަދު 123،308 އަށް އަރައެވެ. އެތައްސަތޭކަ ބަޔަކަށް ލިބުނު ބޮޑެތި ޒަޚަމްތަކަށް އެކަށީގެންވާ ފަރުވާ ނުލިބި ފަހުން ދުނިޔެދޫކޮށްފައި ވެއެވެ.

ލިބުނު ބޮޑެތި ޒަޚަމްތަކާހެދި އަތްފައި ބުރިކޮށްލަން ޖެހުނު މީހުންގެ އަދަދު 4،700 އަށް އަރާފައި ވާއިރު، މީގެ ތެރެއިން 18 އިންސައްތައަކީ ކުޑަކުދިންނެވެ.

ޒަޚަމްގެ ހާލަތުގައި ވަނިކޮށާއި، އަދި އެހެން ގޮތްގޮތުން ޒަޔަނިސްޓުންވަނީ ޣައްޒާއިން 6،663 މީހުން ވަގަށް ނަގައިގެން ގެންދިޔަތާކަށް ގެންގޮސްފައެވެ. އެމީހުންނާބެހޭ އެއްވެސް ޚަބަރެއް ނެތެވެ.

ޒަޔަނިސްޓުން ޣައްޒާއަށް ދެމުންގެންދާ ހަމަލާތަކުގެ ތެރެއިން ސީދާ ޣައްޒާ ސިވިލް ޑިފެންސްގެ ޓީމުތަކަށް ހަމަލާދީ މިހާތަނަށް 115 މީހުން ޝަހީދުކޮށްލާފައި ވާއިރު، 221 ނޫސްވެރިން ޝަހީދުކޮށްލާފައި ވެއެވެ.

ޣައްޒާގެ 39 ހޮސްޕިޓަލަކަށް ބޮންއަޅައި ހަލާކުކޮށްލާފައި ވާއިރު، 82 މެޑިކަލް ސެންޓަކަށް ބޮންއަޅާފައި ވާއިރު، ސިއްހީ ޚިދުމަތްދޭ 164 ތަނަކަށް ހަމަލާދީފައި ވެއެވެ.

144 އެމްބިއުލެންސް ގޮއްވާލާފައި ވާއިރު، ސިވިލް ޑިފެންސްގެ 54 ވެހިކަލަށް ހަމަލާދީ ހަލާކުކޮށްލާފައި ވެއެވެ. ސިއްހީ ޚިދުމަތްދޭ 1،580 މީހުން ޝަހީދުކޮށްލާފައި ވެއެވެ.

ހަމަލާތަކުގެ ސަބަބުން ދެމިލިއަނަށް ވުރެ ގިނަމީހުން މަގުމަތިވެފައި ވާއިރު، ތިންލައްކައަށްވުރެ ގިނަމީހުން މިހާރުވަނީ ގެދޮރު ގެއްލިފައެވެ.