ފެނަކަ ކޯޕަރޭޝަނުން ވޭވަށާއި ދަރަނބޫދޫގެ ކަރަންޓުގެ ޚިދުމަތް އިތުރަށް ހަރުދަނާކުރުމުގެ މަސައްކަތް ފަށައިފިއެވެ. މި މަސައްކަތުގެ ދަށުން، އެ ދެ ރަށުގައި އައު އިންޖީނުތައް ބެހެއްޓުމުގެ މަރުޙަލާ ކުރިއަށްދާކަން ފާހަގަކުރެވެއެވެ.
ފެނަކައިން ދޭ މަޢުލޫމާތުގައިވާ ގޮތުން، ދަރަނބޫދޫ އަދި ވޭވަށަށް 250 ކިލޯވޯޓުގެ އިންޖީނުތަކެއް ވަނީ ފޯރުކޮށްދީފައެވެ. މި ފިޔަވަޅަކީ އެ ދެ ރަށުގެ ކަރަންޓުގެ ޚިދުމަތް އިތުރަށް ރަނގަޅުކުރުމަށް އެޅޭ މުހިންމު ފިޔަވަޅެކެވެ.
ދެމެހެއްޓެނެވި ގޮތުގައި ކަރަންޓުގެ ޚިދުމަތް ދޭން ކުރަމުން އަންނަ މަސައްކަތުގެ ދަށުން، ފ. ދަރަނބޫދުއާއި މ. ވޭވަށުގެ ކަރަންޓު ހާލަތު މިހާރަށް ވުރެ ރަނގަޅު ކޮށް ކަރަންޓު ޚިދުމަތުގެ ގާބިލިއްޔަތު އިތުރުކުރުމަށް ޓަކައި 250 ކވގެ އައު ދެ އިންޖީނު، އެ ދެ ރަށަށް ވަނީ… pic.twitter.com/bEmPAGT8Op
— Fenaka Corporation Ltd (@TeamFenaka) May 5, 2025
ފ. އަތޮޅު ދަރަނބޫދޫ އަދި މ. އަތޮޅު ވޭވަށަކީ ކަރަންޓުގެ ދަތިކަން ދިގު މުއްދަތެއް ވަންދެން ތަޙައްމަލުކުރަމުން އައި ދެ ރަށް ކަމުގައި ފާހަގަކުރެވެއެވެ.
މީގެ ދެ އަހަރެއްހާ ދުވަސް ކުރިން، ފެނަކައިން ވަނީ ވޭވަށުގެ އިންޖީނުގެ ތަރައްޤީކުރުމުގެ މަޝްރޫޢެއް ހިންގާފައެވެ. މި މަޝްރޫޢުގެ ދަށުން، 2022 ވަނަ އަހަރު އެ ރަށުގައި އައު އިންޖީނުގެއެއް ޤާއިމުކޮށް، 400 ކިލޯވޯޓުގެ އިންޖީނެއް ބަހައްޓައި، ޚިދުމަތް ދޭން ފެށިއެވެ. މި މަޝްރޫޢުއަށް 10 މިލިއަން ރުފިޔާ ޚަރަދުކުރެވުނެވެ.
މިހާރު ވޭވަށަށް ފޮނުވާފައިވާ އައު އިންޖީނާއެކު، އެ ރަށުގެ ކަރަންޓު އުފެއްދުމުގެ ޖުމްލަ ޤާބިލުކަން 650 ކިލޯވޯޓަށް އިތުރުވެގެންދާނެ ކަމަށް ލަފާކުރެވެއެވެ. މި ކުރިއެރުމަކީ އެ ރަށުގެ ކަރަންޓުގެ ޚިދުމަތް އިތުރަށް ހަރުދަނާވެ، ރައްޔިތުންނަށް ލިބޭ ޚިދުމަތުގެ ފެންވަރު މަތިވެގެންދާނެ ކަމެއް ކަމުގައި ބެލެވެއެވެ.
ކިޔުންތެރިންގެ ހިޔާލު