އާދީއްތަ ދުވަހުގެ ރޭ 8:00 ކަންހާއިރު ގދ. ގައްދޫއިން ހުޅުމާލެއަށް ދަތުރުކުރަމުންދަނިކޮށް ގެއްލުނު “ބްރިލިއަންޓް ކެރިއަރ” ފެނިއްޖެއެވެ.
އެ ދޯނި ގެއްލިގެން ހޯދަން ފެށީ އިއްޔެއެވެ. ދޯނީގައި 5 މީހުން ދަތުރުކުރި އިރު އޭގެ ތެރޭގައި 3 ދިވެހިންނާއި 2 ބިދޭސީން ހިމެނެއެވެ.
ދިވެހި ފުލުހުންގެ ޚިދުމަތުން ވިދާޅުވީ ދޯންޏާ އެންމެ ފަހުން ގުޅިފައިވަނީ އޭޕްރިލް 28 ވަނަ ދުވަހުގެ ދަންވަރު 2:40 ގައި ކަމަށެވެ. އެއިރު ކެޕްޓަން ވިދާޅުވެފައިވަނީ ހުވަދުއަތޮޅަށް ވަންނަން ކައިރިވެފައިވާ ކަމަށެވެ. އޭގެ ފަހުން ދޯންޏާ ގުޅިފައެއް ނުވާކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ ދޯނި ފެނިފައިވަނީ ރޭ ފަތިހު 5:00 ހާއިރު ލ. އަތޮޅުން ކަމަށެވެ. ދޯނި ފެނުނީ ކޯސްޓް ގާޑަށް ކަމަށާއި ދޯނި އޮތީ އިންޖީނު ހުއްޓިފައި ކަމަށް ވިދާޅުވިއެވެ.
ދޯންޏަށް ބޭނުންވާ އެހީތެރިކަން މިހާރު ފޯރުކޮށްދީފައިވާ ކަމަށާއި ދޯނިން ދަތުރު ކުރަމުން ދިޔަ އެންމެންގެވެސް ހާލު ރަނގަޅު ކަމަށް ފުލުހުން ވިދާޅުވިއެވެ.
