މިމަހުގެ 18 ވަނަ ދުވަހު އިމާރާތަކުން ގެއެއްގެ ފުރާޅުމައްޗަށް ހައްވާ ޔުމްނު ވެއްޓުނު މައްސަލައާ ގުޅިގެން ފުލުހުން ބަލައި ފާސްކުރި ގެތަކުން އެއްވެސް އެއްޗެއް ފެނިފައިނުވާ ކަމަށް ފުލުހުން ބުނެފިއެވެ.
ފުލުހުން ބަލައި ފާސްކޮށްފައިވަނީ ޓްރާންސްޕޯޓް މިނިސްޓަރު މުހައްމަދު އަމީން ދިރިއުޅުއްވާ މއ. މާންދޫގޭގެ އިތުރުން ހ. ކަށިވެލި ގެއެވެ.
ފުލުހުން ބުނީ، އެ ގެތަކުން މައްސަލައާ ގުޅުން ހުރި އެއްވެސް އެއްޗެއް ފެނިފައި ނުވާ ކަމަށާއި ބަލައި ފާސްކޮށްފައިވަނީ މައްސަލައާ ގުޅުންހުރި ކަމަށް ތަހުގީގަށް ފާހަގަވެފައިވާ މީހުންނާ ގުޅުންހުރި ކަމަށް ތަންތަން ކަމަށެވެ.
ފުލުހުން ވަނީ ޔުމްނުއާއެކު، އެރޭ އިމާރާތުގެ ތެރޭގައި ހަރަކާތްތެރިވި ރައުދު ޒިލާލް ހައްޔަރުކޮށްފައެވެ. ކޯޓުން ވަނީ އޭނާ ފަސް ދުވަހަށް ބަންދުކުރުމަށް އަމުރުކޮށްފައެވެ.
ފުލުހުން ވަނީ ރައުދު ހިމެނޭގޮތަށް އެ މައްސަލައިގެ ކުރިން ޔުމްނުއާއެކު އުޅުނު މީހުންގެ ޕާސްޕޯޓު ވެސް ހިފަހައްޓައިފައެވެ. އެއީ ޖުމުލަ ނުވަ މީހެއްގެ ޕާސްޕޯޓެވެ.
އިތުރު ފަރުވާއަށް ސަރުކާރުގެ އެހީއާއެކު މިހާރު ޔުމްނު މެލޭޝިއާއަށް ފުރުވާލާފައިވާ އިރު، ރައީސް ޑރ. މުހައްމަދު މުއިއްޒު ވަނީ ޔުމްނު ވެއްޓި މައްސަލައިގެ ތަހުގީގަށް ހާއްސަ ކޮމިޝަނެއް ވެސް އުފައްދަވައިފައެވެ.
ކިޔުންތެރިންގެ ހިޔާލު