އއ. ރަސްދޫގައި ހިނގި އަލިފާނުގެ ހާދިސާގައި ފިހުނު ފިރިހެން މީހާ، އިންޑިއާގައި ފަރުވާދެމުންދަނިކޮށް ނިޔާވެއްޖެއެވެ.
ރަސްދޫގައި ފިހުނު އަލީ ސާމިން ނިޔާވެފައިވަނީ އިންޑިއާގައި ފަރުވާދެމުންދަނިކޮށް، މިރޭގެ ވަގުތެއްގައެވެ.
އައިޖީއެމްއެޗްގެ އައިސީޔޫގައި ފަރުވާދިނުމަށްފަހު، އިތުރު ފަރުވާއަށް ސާމިން އިންޑިއާއަށް ގެންގޮސްފައިވަނީ މިމަހުގެ ހަތްވަނަ ދުވަހުއެވެ. އޭރު ވެސް އޭނާގެ ހާލު ސީރިއަސްއެވެ.
މިދިޔަ މަހުގެ 24 ވަނަ ދުވަހުގެ ރޭ 11:15 ހާއިރު ރަސްދޫގެ ގެއެއްގައި ހިނގި އަލިފާނުގެ ހާދިސާއެއްގައި ފިހިފައިވަނީ ކުރިން ކައިވެނީގެ ގޮތުން ގުޅިގެން އުޅުނު ދެ މީހަކަށެވެ.
އެ އަލިފާނުގެ ހާދިސާގައި އެންމެ ބޮޑަށް އަނިޔާވެފައިވަނީ އަންހެން މީހާއަށެވެ. އޭނާއަށް އައިޖީއެމްއެޗުގައި ފަރުވާ ދެމުން ދަނިކޮށް މިދިޔަ މަހުގެ 31 ވަނަ ދުވަހު ވަނީ ނިޔާވެފައެވެ.
ފިރިހެން މީހާއަށް ވެސް ފުރަތަމަ ފަރުވާދެމުންދިޔައީ ވެންޓިލޭޓަރުގައެވެ. ނަމަވެސް ފަހުން ވެންޓިލޭޓަރުން ނަގައި އައިސީޔޫގައި ފަރުވާދޭން ވަނީ ފަށައިފައެވެ.
