މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް)ގެ ނައިބު ރައީސްގެ މަޤާމަށް ޝިފްލާ އިބްރާހިމް އިންތިޚާބުވެއްޖެއެވެ.

މި މަޤާމަށް ޝިފްލާ އިންތިޚާބުވެފައިވާކަން އަންގައިދެމުން، ބްރޯޑްކޮމުން މިއަދު އޭނާއަށް މަރުޙަބާ ކިޔާފައިވެއެވެ. ޝިފްލާ ބްރޯޑްކޮމްގެ މެންބަރުކަމަށް އައްޔަނުކުރެވުނީ 2021 ވަނަ އަހަރުއެވެ.

ޝިފްލާއަކީ ދައުލަތުގެ މީޑިއާ، ޓީވީ މޯލްޑިވްސްގައި ދިގު މުއްދަތަކަށް ޚިދުމަތްކޮށްފައިވާ، ބްރޯޑްކާސްޓިންގ ދާއިރާގައި އެންމެ ފާހަގަކޮށްލެވޭ އެއް ޓީވީ ހޯސްޓެވެ. އޭނާ ވަނީ ގިނަ އަހަރުތަކެއް ވަންދެން ޓީވީ މޯލްޑިވްސްގައި ޚަބަރު ކިޔައިދީފައެވެ.

ދިވެހިންގެ މެދުގައި އެންމެ މަޝްހޫރުވި ބައެއް ޕްރޮގްރާމްތައް ޝިފްލާ ވަނީ ހުށަހަޅާފައެވެ. މީގެ ތެރޭގައި “ދިވެހީންނާއި މިއުޒިކު” އަދި “ފިލްމީ އުދަރެސް” ފަދަ ޕްރޮގްރާމްތައް ފާހަގަކޮށްލެވެއެވެ.

ބްރޯޑްކޮމްގެ ނައިބު ރައީސްގެ މަޤާމު ހުސްވީ، އެ މަޤާމުގައި ކުރިން ހުންނެވި މުޙައްމަދު ފަޒީން އިސްތިއުފާ ދެއްވުމާ ގުޅިގެންނެވެ. ފަޒީން އިސްތިއުފާ ދެއްވީ، ޖިންސީ ފުރައްސާރައިގެ މައްސަލައެއްގައި އޭނާ މަޤާމުން ވަކިކުރުމުގެ މަސައްކަތް ރައްޔިތުންގެ މަޖިލީހުން ފަށާފައިވަނިކޮށެވެ. މި މައްސަލަ މަޖިލީހަށް ހުށަހެޅީ، ބްރޯޑްކޮމްގެ އަންހެން މުވައްޒަފަކަށް ފަޒީން ޖިންސީ ފުރައްސާރަ ކުރިކަމަށް ތުހުމަތުކުރެވޭ މުވައްޒަފެވެ.