ދިވެހި ފުލުހުންގެ ޚިދުމަތުގެ 92 ވަނަ އަހަރީ ދުވަސް ފާހަގަކުރުމުގެ ގޮތުން ޤައުމީ ފެންވަރުގައި ޚާއްޞަ ހަރަކާތްތަކެއް ކުރިއަށްދާއިރު، އެ ހަރަކާތްތަކުގެ ތެރެއިން ތިމާވެށި ރައްކާތެރިކުރުމަށް އަމާޒުކޮށްގެން ގަސް އިންދުމުގެ މުހިންމު މަސައްކަތެއް ފެށިގެން ގޮސްފިއެވެ.
އދ. މާމިގިލީގައި މި ހަރަކާތް ރަސްމީކޮށް ފައްޓަވައިދެއްވީ ކޮމިޝަނަރ އޮފް ޕޮލިސް އަލްފާޟިލް ޢަލީ ޝުޖާޢުއެވެ. މި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް އަލްފާޟިލް ފަރުހާދު ފިކުރީއާއި، ރައްޔިތުންގެ މަޖިލީހުގެ މާމިގިލި ދާއިރާގެ މެންބަރު އަލްފާޟިލް ޤާސިމް އިބްރާހީމްގެ އިތުރުން ފުލުހުފުލުހުންގެ ޚިދުމަތުގެ އިސް އޮފިސަރުން ބައިވެރިވެވަޑައިގެންނެވިއެވެ.
މި ހަރަކާތުގެ ދަށުން މާމިގިލީގައި 10 އަނބުގަސް އިންދުނެވެ. އަދި ރާއްޖޭގެ އެކި ކަންކޮޅުތަކުގައި ފުލުހުންގެ ޚިދުމަތް ޤާއިމުވެފައިވާ ހުރިހާ ރަށެއްގައިވެސް މޭވާ ގަސް އިންދުމަށް ވަނީ ހަމަޖެހިފައެވެ. މި މަސައްކަތުގައި ފުލުހުންގެ ޚިދުމަތުގެ މުވައްޒަފުން ބައިވެރިވާނެއެވެ.
މީގެ އިތުރުން، އަހަރީ ދުވަހާ ގުޅުވައިގެން ހިންގޭ ޚާއްޞަ ހަރަކާތްތަކުގެ ތެރޭގައި މުވައްޒަފުންގެ ލޭ ހަދިޔާކުރުމުގެ ކެމްޕޭނެއް މާރިޗު މަހުން ފެށިގެން ކުރިއަށްދާކަން ފާހަގަކޮށްލެވެއެވެ. ދިވެހި ފުލުހުންގެ ޚިދުމަތުގެ އަހަރީ ދުވަހަކީ މާރިޗު މަހުގެ 29 ވަނަ ދުވަހެވެ.
