އައްޑޫގެ ލިންކު ރޯޑު ތަރައްޤީކުރުމުގެ މަސައްކަތް ރޯޑް ޑިވަލޮޕްމެންޓް ކޯޕަރޭޝަން (އާރްޑީސީ)އާ ހަވާލުކޮށްފިއެވެ.

މި އެއްބަސްވުމުގައި އިމާރާތްކުރުމާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. ޢަބްދުﷲ މުއްޠަލިބެވެ. އާރުޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ބްރިގޭޑިޔަރ ޖެނެރަލް (ރިޓަޔަރޑް) ޢަލީ ޒުހައިރެވެ.

އެ މަސައްކަތް އާރްޑީސީއާ ހަވާލުކުރުމުގެ ރަސްމިއްޔާތުގައި ވާހަކަދައްކަވަމުން އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ، އައްޑޫ ލިންކު ރޯޑުގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ދަށުން މަގުތަކުގައި ތާރު އަޅައި، ޒަމާނީ ފެން ހިންދާ ނިޒާމެއް ޤާއިމުކުރެވޭނެ ކަމަށެވެ. އަދި މި މަސައްކަތާއެކު އައްޑޫ ފޭދޫގެ މަގުތަކުގައި ފެންބޮޑުވާ މައްސަލަ ހައްލުކުރުމަށް އެ މަގުތަކުގައި ފެން ހިންދާ ނިޒާމެއް ޤާއިމުކުރުމުގެ މަސައްކަތްވެސް އާރުޑީސީން ކުރާނެކަމަށް ވަޒީރު ވިދާޅުވިއެވެ.

ލިންކް ރޯޑުގެ މަސައްކަތުގެ ދަށުން ޖުމްލަ 12.3 ކިލޯމީޓަރުގެ ސަރަހައްދެއްގައި މަސައްކަތްކުރާނެއެވެ. އަދި 67.58 ކިލޯމީޓަރުގެ ސީ.ޓީ.ބީ އަޅާފައިވާ މަގުތަކުގައި ތާރު އަޅާނެއެވެ.

އަމާޒަކީ ލިންކު ރޯޑުގެ މަސައްކަތް 2028 ވަނަ އަހަރު ނިމުމުގެ ކުރިން ނިންމާލުން ކަމަށް ވެސް ވަޒީރު ވިދާޅުވިއެވެ.

“ލިންކް ރޯޑްގެ މަސައްކަތުގެ ތެރޭގައި ހިމެނޭނެ ލިންކް ރޯޑު ފުޅާކުރުމަށްޓަކައި އަލަށް ވެލި އަޅައިގެން މީގެ ކުރިންވެސް ކަނޑައަޅާފައިވާ ސަރަހައްދުވެސް. މުޅިން އަލަށް 5.5 ކިލޯމީޓަރުގެ މަގު ހެދުން އޮންނާނެ.” ވަޒީރު ވިދާޅުވިއެވެ.

އެ މަޝްރޫއުގެ ދަށުން އައްޑޫ ސިޓީ ލިންކް ރޯޑުގެ މަގުތައް ޒަމާނީ ފެންވަރަށް ތަރައްޤީކުރުމާއި ފެން ހިންދާ ނިޒާމު ޤާއިމުކުރުމު ކުރާނެއެވެ.

މި މަސައްކަތްތައް އާރުޑީސީއާ ޙަވާލުކޮށްފައިވަނީ 3 އަހަރާއި 11 މަސް ދުވަހުން މަސައްކަތް ނިންމާ ގޮތަށެވެ. މި މަސައްކަތް ހަވާލުކޮށްފައިވަނީ 829 މިލިޔަން ރުފިޔާއަށެވެ.