ލ. މާވަށުގެ ކަރަންޓު ޚިދުމަތުގެ ފެންވަރު މަތިކޮށް، ކެޕޭސިޓީ އިތުރުކުރުމުގެ މަޤްޞަދުގައި 800 ކިލޯވޮޓުގެ އައު ޖަނަރޭޓަރެއް އެ ރަށަށް ގެންދެވިއްޖެއެވެ.
ފެނަކަ ކޯޕަރޭޝަނުން މަޢުލޫމާތު ދެއްވިގޮތުގައި، މި ޖަނަރޭޓަރަކީ ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށް ކުރަމުންދާ މަސައްކަތްތަކުގެ ތެރެއިން، ލ. މާވަށުގެ ކަރަންޓުގެ ޙާލަތު ރަނގަޅުކުރުމަށްޓަކައި ގެންދެވުނު އިންޖީނެކެވެ. މިހާރު މި ޖަނަރޭޓަރު އިންސްޓޯލްކުރުމުގެ މަސައްކަތް ދަނީ ކުރެވެމުންނެވެ.
ފެނަކައިން އިތުރަށް ހާމަކުރެއްވި ގޮތުގައި، ކުރިއަށް އޮތް ހަފުތާއެއްހާ ދުވަހުގެ ތެރޭގައި އިންސްޓޯލްކުރުމުގެ މަސައްކަތް ނިންމައި، ޚިދުމަތް ދޭން ފެށޭނެކަމަށް ލަފާކުރެވެއެވެ.
ފެނަކަ ކޯޕަރޭޝަނުން ދިވެހިރާއްޖޭގެ 157 ރަށަކަށް ކަރަންޓުގެ ޚިދުމަތް ފޯރުކޮށްދެމުން ގެންދެއެވެ. މި ރަށްތަކުގައި ކަރަންޓުގެ ޚިދުމަތް ފޯރުކޮށްދިނުމުގައި ހުރި ގޮންޖެހުންތައް ޙައްލުކޮށް، ކެޕޭސިޓީ އިތުރުކުރުމަށް އެ ކުންފުނިން ވަނީ ގިނަގުނަ މަސައްކަތްތަކެއް ކުރައްވާފައެވެ. މިގޮތުން، ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށް ކުރާ މަސައްކަތުގެ ދަށުން، ވޭތުވެދިޔަ އަހަރު ނިމުނުއިރު 53 ރަށަކަށް 61 ޖަނަރޭޓަރު ސެޓު ފެނަކައިން ވަނީ ފޯރުކޮށްދެއްވާފައެވެ.
ކިޔުންތެރިންގެ ހިޔާލު