ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިނގިރޭސިވިލާތުގެ ލިވަޕޫލް ސިޓީއަށް ކުރެއްވި ރަސްމީ ދަތުރުފުޅު ނިންމަވާލައްވައިފިއެވެ. މި ދަތުރުފުޅުގެ މައިގަނޑު މަޤްޞަދަކީ ލިވަޕޫލް ފުޓްބޯލް ކްލަބާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރު.ސީ) / ވިޒިޓް މޯލްޑިވްސްއާ ގުޅިގެން ކުރިއަށްގެންދާ ކޯ-ބްރޭންޑް ކެމްޕޭން ރަސްމީކޮށް ފެށުމެވެ.

ދަތުރުފުޅުގެ ތެރޭގައި ރައީސުލްޖުމްހޫރިއްޔާ:
1. ކެމްޕޭން ފެށުމުގެ ގޮތުން ބޭއްވުނު ފުޓުބޯޅަ މެޗު ބައްލަވާލެއްވިއެވެ.
2. އަކްސާ ޓްރެއިނިންގް ސެންޓަރަށް ޒިޔާރަތްކުރައްވައި، ޕްރޮފެޝަނަލް ފުޓުބޯޅަ ތަމްރީނާއި ކޯޗިންގްގެ ކަންކަން ހިނގާގޮތް ދެނެވަޑައިގަތެވެ.
3. އިނގިރޭސިވިލާތުގައި ތަޢުލީމު ޙާޞިލުކުރަމުންދާ ދިވެހި ދަރިވަރުންނާ ބައްދަލުކުރައްވައި، އެ ދަރިވަރުންގެ ތަޢުލީމީ ކަންކަމާއި ތަޖުރިބާތަކާ ބެހޭގޮތުން މަޝްވަރާކުރެއްވިއެވެ.

މި ޕާޓްނަރޝިޕްގެ ދަށުން، ވިޒިޓް މޯލްޑިވްސްއިން ވަނީ އިނގިރޭސިވިލާތުގައި ފުޅާ ދާއިރާއެއްގައި އައުޓްޑޯ ކެމްޕޭނެއް ފަށާފައެވެ. މި ކެމްޕޭންގެ ދަށުން ލަންޑަންގެ އެކި ސަރަޙައްދުތަކުގައާއި، ޕްރިމިއަރ ލީގް މެޗުތަކުގައި، އަދި ޔޫރަޕުގެ އެކި ސަރަޙައްދުތަކުގައި ދިވެހިރާއްޖޭގެ ފަތުރުވެރިކަން އިޝްތިހާރުކުރެވޭނެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ސަރުކާރުގެ އިސް ވަޒީރުންނާއި އެހެނިހެން އިސްވެރިން ބައިވެރިވެވަޑައިގެންނެވިއެވެ.