ކުރެވުނު ހެޔޮ ޢަމަލުތަކަށް އަމިއްލަ ނަފުސަށް ބޮޑާވެ، ފަޚުރުވެރިވުމުގެ ސަބަބުން އެ ޢަމަލުތައް ބާޠިލުވެދާނެކަމަށް މިއަދުގެ ހުކުރު ޚުޠުބާގައި އިންޒާރު ދެއްވައިފިއެވެ.
“ރަމަޟާންމަހަށް ފަހު ހެޔޮ ޢަމަލުކުރުން މަތީ ދެމިތިބުން” މި މައުޟޫޢުގައި ދެއްވުނު ޚުޠުބާގައި، މުއުމިނުންނަކީ ވަކި މަހެއްގައި ނުވަތަ މޫސުމެއްގައި އެކަނި އަޅުކަން ކުރަންޖެހޭ ބައެއް ނޫންކަން ހާމަކުރެއްވިއެވެ. އަދި މުޅި ޙަޔާތުގައިވެސް އަޅުކަމުގައި ދެމިތިބުމަށް އިލްތިމާސް ކުރެއްވިއެވެ.
ކުރެވިފައިވާ އަޅުކަންތަކަކީ ގިނަގުނަ ހެޔޮ ޢަމަލުތަކެއް ކަމުގައި ދެކިގެން ނުވާނެކަމަށާއި، އެފަދައިން ދެކުމަކީ އެ ޢަމަލުތައް ބާޠިލުވުމަށް މަގުފަހިވެދާނެ ކަމެއްކަން ޚުޠުބާގައި ފާހަގަކުރެއްވިއެވެ. އަދި ހެޔޮ ޢަމަލުތައް ކުރުމަށްފަހު އޭގެ މަތީ ދެމިތިބުމުގެ މުހިންމުކަން އަންގަވައި، ވަކި ޢަމަލެއްގެ މޮޅުކަމުން ނުވަތަ ގިނަކަމުން ސުވަރުގެ ޔަޤީންވީކަމަށް ދެކިގެން ނުވާނެކަމަށް ނަސޭހަތްތެރިވެވަޑައިގަތެވެ.
ރަމަޟާން މަހުގެ ޢަމަލުތަކާމެދު ވިސްނުމަށާއި، އެ މަހުގައި ކުރެވުނު ހެޔޮ ޢަމަލުތައް ދެމެހެއްޓުމަށް ގޮވާލެއްވިއެވެ. ޚާއްޞަކޮށް ފަރުޟު ފަސް ނަމާދު ޤަވާޢިދުން އަދާކުރުމާއި، ދުވާލަކު ޤުރްއާނުގެ ޞަފްޙާއެއް ނަމަވެސް ކިޔެވުމަށް ބާރުއެޅުއްވިއެވެ.
އިތުރުން، ގިނައިން ތައުބާވެ އިސްތިޣުފާރުކުރުމަށް އިރުޝާދު ދެއްވައި، ހެޔޮ ޢަމަލުތަކަކީ ނުބައި ކަންތައްތައް ފޮހެލާ ކައްފާރާއެއްކަން ހާމަކުރެއްވިއެވެ. އަދި ރަމަޟާން މަހު އަޅުކަމުގައި އުނިވެފައިވާނަމަ، ތައުބާވުމަކީ ލިބިފައިވާ ރަނުގެ ފުރުޞަތެއްކަން ހަނދާންކޮށްދެއްވިއެވެ.
ޝައްވާލު މަހުގެ ހަ ރޯދައިގެ މާތްކަމާއި، ފިޠުރު ޒަކާތުގެ މުހިންމުކަންވެސް ޚުޠުބާގައި ފާހަގަކުރެއްވިއެވެ. ޝައްވާލު މަހުގެ ހަ ރޯދައަކީ މުއުމިނުންނަށް ލިބޭ މަތިވެރި ނިޢުމަތެއްކަމަށާއި، ފިޠުރު ޒަކާތަކީ ރަމަޟާން މަހު ރޯދައިގައި އުނިވެފައިވާ ކަންކަން ފޫބައްދައިދޭ ވަސީލަތެއްކަން ބަޔާންކުރެއްވިއެވެ.
ކިޔުންތެރިންގެ ހިޔާލު