ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހިންގި “ބިންވެރިޔާ” ސްކީމުގެ ދަށުން ވަގަށް ގޯތި ދޫކުރި މައްސަލައިގައި ފުރުން މަނާކުރި އެންމެންގެ ޕާސްޕޯޓް ދޫކޮށްލައިފިއެވެ.
އެ މައްސަލައާ ގުޅިގެން ފުލުހުން ވަނީ މިދިޔަ އަހަރުގެ ޑިސެމްބަރު މަހުގެ ތެރޭގައި، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ ކުރީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާއި އޭނާގެ ބޭބެ އެމްޑަބްލިޔުއެސްސީގެ ކުރީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނޭހެން، 20 މީހެއްގެ ޕާސްޕޯޓު ހިފަހައްޓައިފިއެވެ.
ފުލުހުން ބުނީ ބިންވެރިޔާ ސްކީމާ ގުޅުން ހުރި މައްސަލައިގައި ފުރުން މަނާކުރި އެންމެންގެ ފުރުން މަނާކުރި އަމުރު ބާތިލުކޮށްފައިވާ ކަމަށެވެ.
ބިންވެރިޔާގެ ސްކީމުން އެއްބިމަކަށް އެއް ފަރާތަށްވުރެ ގިނަ ފަރާތްތަކުން އިމާރާތްކުރުމުގެ ހުއްދައަށް އެދި އެޗްޑީސީއަށް ހުށަހަޅާ މައްސަލަ މިދިޔަ ޑިސެމްބަރު މަހުގެ ތެރޭގައި ވަނީ ބޮޑުވެފައެވެ. އެ މައްސަލަ ފުރަތަމަ ފާހަގަވީ އެޗްޑީސީގެ ކުރީގެ މެނޭޖިން ޑިރެކްޓަރު ފަޒުލްގެ ބޭބެ އަދި ފަޒީލަށް ހުޅުމާލެއިން ބިމެއް ދިން މައްސަލަ ފެންމަތިވުމާއެކުއެވެ.
އެޗްޑީސީން ވަނީ އެފަދަ ގިނަ މައްސަލަތަކެއް ފާހަގަވުމާއެކު މިިމަހުގެ 17 ވަނަ ދުވަހު ފުލަހުންނަށް އެ މައްސަލަ ހުށަހަޅައިފައެވެ. ބިންވެރިޔާ ސްކީމުގެ ދަށުން ހުޅުމާލެއިން ދޫކޮށްފައިވާ ބިންތަކުގެ އިމާރާތްކުރުމުގެ ހުއްދައަށް އެދޭ އިރު، އެއްބިމަކަށް އެއް ފަރާތަށްވުރެ ގިނަ ފަރާތްތަކުން އިމާރާތްކުރުމުގެ ހުއްދައަށް އެދި އެ ކޯޕަރޭޝަނަށް ހުށަހަޅަމުންދާތީ، އެކަން އެ ކޯޕަރޭޝަނުގެ ސަމާލުކަމަށް އައިސް، އެކަން އިތުރަށް ބަލައި އެކަމާ ގުޅިގެން އަޅަންޖެހޭ ފިޔަވަޅުތައް އަޅަމުންދާ ކަމަށް އެޗްޑީސީން ބުނެފައިވެއެވެ.
އެޗްޑީސީން ބުނެފައިވަނީ އެ މައްސަލަ ތަހުގީގުކުރުމަށް ފުލުހުންނަށް ހުށަހަޅާފައިވަނީ ބިންވެރިޔާ ސްކީމްގެ ދަށުން ހުޅުމާލެއިން ދޫކުރެވުނު ބިންތަކާ ގުޅޭގޮތުން ހާއްސަ އޮޑިޓެއްކޮށް، އެ އޮޑިޓުން، ބިންވެރިޔާ ސްކީމާ ގުޅޭ އެފަދަ އިތުރު މައްސަލަތަކެއް ފާހަގަވެފައިވާތީ ކަމަށެވެ.
