އިލެކްޝަންސް ކޮމިޝަނުން ހާމަކުރެއްވި ގޮތުގައި، ދެ ސިޔާސީ ޕާޓީއެއް ފިޔަވައި އެހެން ހުރިހާ ޕާޓީތަކުން 2024 ވަނަ އަހަރުގެ އަހަރީ ރިޕޯޓު ހުށަހަޅުއްވާފައިވެއެވެ. ސިޔާސީ ޕާޓީގެ ޤާނޫނުގެ ދަށުން، ކޮންމެ އަހަރަކުވެސް ޕާޓީތަކުން އަހަރީ ރިޕޯޓު އިލެކްޝަންސް ކޮމިޝަނަށް ހުށަހެޅުން ލާޒިމުވެއެވެ. މިއަހަރުގެ ރިޕޯޓުތައް ހުށަހެޅުމުގެ ސުންގަޑި ހަމަވެފައިވަނީ މި މަހުގެ 1 ވަނަ ދުވަހުއެވެ.
ރާއްޖޭގައި ރަޖިސްޓަރީކޮށްފައިވާ 9 ސިޔާސީ ޕާޓީގެ ތެރެއިން 7 ޕާޓީއަކުން އަހަރީ ރިޕޯޓު ހުށަހަޅުއްވާފައިވާކަމަށް އިލެކްޝަންސް ކޮމިޝަނުން ވިދާޅުވެފައިވެއެވެ. މިގޮތުން ރިޕޯޓު ހުށަހެޅުއްވި ޕާޓީތަކުގެ ތެރޭގައި ޕީއެންސީ، އެމްޑީޕީ، ޖުމްހޫރީ ޕާޓީ، އަދާލަތު ޕާޓީ، އެމްއެންޕީ، އެމްޑީއޭ އަދި ދަ ޑިމޮކްރެޓްސް ހިމެނެއެވެ.
މިހާތަނަށް އަހަރީ ރިޕޯޓު ހުށަނާޅާ ދެ ޕާޓީއަކީ ޕީޕަލްސް ނޭޝަނަލް ފްރަންޓް (ޕީއެންއެފް) އާއި މޯލްޑިވްސް ތަރޑްވޭ ޑިމޮކްރެޓްސް (އެމްޓީޑީ) އެވެ. އިލެކްޝަންސް ކޮމިޝަނުގެ ނައިބު ރައީސް ޢަބްދުއްރަޙްމާން ސަލާޙު ރަޝީދު ވިދާޅުވެފައިވަނީ، މި ދެ ޕާޓީއަށް އަންގާރަ ދުވަހާ ހަމައަށް ރިޕޯޓު ހުށަހެޅުމަށް އިތުރު ފުރުސަތެއް ދެއްވާފައިވާ ކަމަށެވެ. އަދި މި މުއްދަތުގެ ތެރޭގައިވެސް ރިޕޯޓު ހުށަނާޅައިފިނަމަ، އެ ދެ ޕާޓީއާމެދު ޤާނޫނީ ފިޔަވަޅު އަޅުއްވާނެ ކަމަށްވެސް އެމަނިކުފާނު ވިދާޅުވެފައިވެއެވެ.
އިލެކްޝަންސް ކޮމިޝަނުން މިފަދަ ތަފްސީލީ މަޢުލޫމާތު ހާމަކުރެއްވީ ފުރަތަމަ ފަހަރަށެވެ. މި މަޢުލޫމާތުތައް ހާމަކުރެއްވުމުގެ މަޤްޞަދަކީ ޕާޓީތައް މޮނިޓަރކުރުމުގެ މަސައްކަތް އިތުރަށް ހަރުދަނާކުރުން ކަމަށް އެ ކޮމިޝަނުން ވިދާޅުވެފައިވެއެވެ.
