އެމްޑީޕީން ކުރަމުންދާ ސިލްސިލާ މުޒާހަރާތަކުގައި، ސުލްހަވެރިކަމާއެކު އެއްވެ އުޅުމުގެ ގާނޫނާ ހިލާފަށް އަމަލުކުރިކަމުގެ ތުހުމަތުގައި މަކުނުދޫ ދާއިރާގެ ކުރީގެ މެމްބަރު މުހައްމަދު ރާއީ އާއި އާރްޑީސީގެ ކުރީގެ މެނޭޖިން ޑިރެކްޓަރު މޫސާ އަލިމަނިކު ފުލުސް އޮފީހަށް ހާޒިރުވާން އަންގައިފިއެވެ.

އެ ދެ ބޭފުޅުން ފުލުސް އޮފީހަށް ހާޒިރުކުރަނީ މާދަމާ މެންދުރު 13:00އަށެވެ.

އެ ދެ ބޭފުޅުން ހާޒިރުކުރަނީ އާދީއްތަ ދުވަހު ބޭއްވި މުޒާހަރާގައި އެއްވެ އުޅުމުގެ މިނިވަންކަމުގެ ގާނޫނާ ހިލާފަށް މާލޭގެ އެކި ސަރަހައްދުތަކަށް އެއްވެ އަޑުގަދަކުރުމާއި، މުޒާހަރާކޮށް އާންމު ދަތުރުފަތުރަށާއި ވިޔަފާރިތަކަށް ދަތިވާނެ ގޮތަށް އަމަލުކުރި ކަމަށް ތުހުމަތުކޮށެވެ.

މީގެ އިތުރުން، ފުލުހުންގެ ދައުރު އަދާކުރުމަށް ހުރަސް އެޅުމާއި، ފުލުހުންގެ އަމުރަށް ނުކިޔަމަންތެރިވުމާއި، ފުލުހުންގެ ވާޖިބު އަދާކުރުމަށް ހުރަސް އެޅުމުގެ ތުހުމަތުވެސް މި ދެ ބޭފުޅުންގެ މައްޗަށް ކުރެވިފައިވެއެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ޝަރުއީ ދާއިރާއަށް ނުފޫޒުފޯރުވާ ކަމަށް ބުނެ އެމްޑީޕީން އަންނަނީ ކޮންމެ ރެއަކު މާލޭގެ މަގުމައްޗަށް އެއްވެ މުޒާހަރާކުރަމުންނެވެ.