ދިވެހި ފުލުހުންގެ ޚިދުމަތާއި މޯލްޑިވްސް ނޭޝަނަލް ޑިފެންސް ފޯސް ގުޅިގެން ކުރިއަށްގެންދިޔަ ޤައުމީ ސަލާމަތާ ގުޅުންހުރި ޚާއްސަ އޮޕަރޭޝަނެއްގައި ތިން ފަރާތެއް ހައްޔަރުކުރެވިއްޖެއެވެ. މި އޮޕަރޭޝަނަކީ ފުލުހުންގެ އިންޓެލިޖެންސް ޔުނިޓަށް ލިބުނު މަޢުލޫމާތަކާ ގުޅިގެން ކުރިއަށްގެންދެވުނު އޮޕަރޭޝަނެއްކަމަށް ފުލުހުން މަޢުލޫމާތު ދެއްވާފައިވެއެވެ.
އިއްޔެ ރޭ 23:00 ގައި ފެށުނު މި އޮޕަރޭޝަންގައި މާލެ އާއި ހުޅުމާލޭގެ ބައެއް ގެތަކާއި އުޅަނދުފަހަރު ބަލައި ފާސްކުރެވުނެވެ. އަދި މި ތަންތަނުން ބައެއް ތަކެތި ސަލާމަތީ ބާރުތަކުގެ ބެލުމުގެ ދަށަށް ގެންދެވިފައިވާކަމަށް މަޢުލޫމާތު ލިބިފައިވެއެވެ.
ހައްޔަރުކުރެވުނު ތިން ފަރާތާ ގުޅުންހުރި އިތުރު ތަންތަން ބަލައި ފާސްކުރުމުގެ މަސައްކަތް ކުރިއަށްދާކަމަށް ފުލުހުން ވިދާޅުވެފައިވެއެވެ. މި މައްސަލައަކީ ޤައުމީ ސަލާމަތާ ގުޅުންހުރި މައްސަލައަކަށްވާތީ، ހާމަކުރެވެން އޮތް މިންވަރަކުން މަޢުލޫމާތު ހާމަކުރަމުން ގެންދާނެކަމަށް ސަލާމަތީ ބާރުތަކުން ވަނީ އަންގަވާފައެވެ.
މި އޮޕަރޭޝަން ނިމުމަކަށް އައިސްފައިވާކަން އަދި ސަލާމަތީ ބާރުތަކުން ރަސްމީކޮށް އިޢުލާނުކުރައްވާފައެއް ނުވެއެވެ. މި މައްސަލައާ ގުޅޭ އިތުރު ތަފްސީލުތައް ލިބުމުން އާންމުކުރެވޭނެއެވެ.
ކިޔުންތެރިންގެ ހިޔާލު