މަސްތުވާތަކެތީގެ ފަރުވާ ހޯދަމުންދިޔަ ދެ ފަރާތެއް ހުޅުމާލޭގައި ހުންނަ ފަރުވާދޭ މަރުކަޒުން ފިލައިގެން ގޮސް، މަސްތުވާތަކެތި ބޭނުންކުރަމުންދަނިކޮށް ފުލުހުންގެ ބެލުމުގެ ދަށަށް ގެނެވިއްޖެއެވެ.

މި މައްސަލައިގައި ހައްޔަރުކުރެވުނީ ސ. ހިތަދޫ/ ކުރިބޯށިގެ، މުހައްމަދު ޒަރީރު (37 އަހަރު) އާއި ގ. ސެންޓުގެ އާގެ/ މުހައްމަދު އަލިމަނިކު (40 އަހަރު) އެވެ.

ކްރިމިނަލް ކޯޓުން އިއްޔެ ރޭ ނެރުނު ބަންދު އަމުރުގައި ބަޔާންކޮށްފައިވާ ގޮތުގައި، މި ދެ ފަރާތުގެ ހައްޔަރާއި ބަންދުގެ ޤާނޫނީ ހަމަތައް ފުރިހަމަވެފައިވެއެވެ. އަދި މުޖުތަމަޢުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި، މި ދެ ފަރާތް 15 ދުވަހުގެ މުއްދަތަށް ކަސްޓޯޑިއަލް ޖަލެއްގައި ބަންދުކުރުމަށް ކްރިމިނަލް ކޯޓުން އަމުރުކޮށްފައިވެއެވެ.

މަސްތުވާތަކެތީގެ މައްސަލަތަކުގައި ފަރުވާ ހޯދުމަށް ޙުކުމްކުރުމަކީ އާންމު ކަމެކެވެ. ނަމަވެސް، ފަރުވާއަށް އެއްބާރުލުން ނުދިނުމަކީ ކަންބޮޑުވާންޖެހޭ މައްސަލައެކެވެ.

ނެޝަނަލް ޑްރަގް އެޖެންސީ (އެންޑީއޭ) އިން ފާއިތުވި ނޮވެމްބަރު މަހު ހާމަކުރި ގޮތުގައި، ފަރުވާއަށް އެއްބާރުލުން ނުދޭ ފަރާތްތަކާމެދު ފިޔަވަޅު އެޅުމުގެ މަސައްކަތް ފަށާފައިވެއެވެ.