ދިވެހިރާއްޖޭގެ ޤާނޫނުއަސާސީ އިޞްލާޙުކުރުމުގެ ބާރު ލިބިގެންވަނީ ރައްޔިތްޔިތުންގެ މަޖިލީހަށްކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ. އިޖުތިމާޢީ މީޑިއާގައި ޙިއްޞާކުރެއްވި ޕޯސްޓެއްގައި އެމަނިކުފާނު ވިދާޅުވެފައިވަނީ، އެމަނިކުފާނުގެ ދެކެވަޑައިގަތުމުގައި ޤާނޫނުއަސާސީ އިޞްލާޙުކުރުމުގެ އިޚްތިޔާރު ލިބިގެންވަނީ ރައްޔިތުންގެ މަޖިލީހަށްކަމަށެވެ. އަދި ޤާނޫނުއަސާސީގެ ނަޒަރުގައި އެއަށް ބަދަލެއް ގެންނަން ބޭނުންވާނަމަ، ރައްޔިތުންގެ ޚިޔާލު ހޯދުމަށް ވޯޓެއް ނަގަންޖެހޭނެކަމަށާއި، އެންމެ ފަހުގެ ނިންމުން އޮންނާނީ ސީދާ ރައްޔިތުންގެ އަތްމަތީގައިކަމަށްވެސް އެމަނިކުފާނު ވިދާޅުވިއެވެ.
ރައީސް ނަޝީދުގެ މި ބަސްފުޅުތައް އައިސްފައިވަނީ، ޤާނޫނީ ގޮތުން ނިންމަވަންޖެހޭ މުހިންމު ތިން ނިންމެވުމަކާ ގުޅޭގޮތުން ރައްޔިތުންގެ ޚިޔާލު ހޯއްދެވުމަށް ވޯޓެއް ނަންގަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ދަނޑިވަޅެއްގައެވެ. މިގޮތުން، ވެރިކަން ބަދަލުވާ ދުވަސް ޖުމްހޫރީ ދުވަހަށް ބަދަލުކުރުމާއި، ރިޔާސީ އަދި މަޖިލިސް އިންތިޚާބު އެއްކޮށް ބޭއްވުމާއި، ރިޔާސީ އިންތިޚާބުގެ ދެވަނަ ބުރު އުވާލައި އެއް ބުރުން ރައީސަކު އިންތިޚާބުކުރާ ގޮތަށް ޤާނޫނުއަސާސީ އިޞްލާޙުކުރުމާ ގުޅޭގޮތުން ރައްޔިތުންގެ ޚިޔާލު ހޯއްދަވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައިިވެއެވެ.
