އެސްޓީއޯއިން ރަމަޟާން މަހަށް ޚާއްސަކޮށްގެން ލުނބޯ އަގުހެޔޮކޮށް ވިއްކަން ފަށައިފިއެވެ. މިހާރު ބާޒާރުގައި ލުނބޯ ކިލޯއެއްގެ އަގު 75 ރުފިޔާއާއި 85 ރުފިޔާއާ ދެމެދުގައި ހުރިއިރު، އެސްޓީއޯއިން ލުނބޯ ކިލޯއެއް ވިއްކަމުންދަނީ 40 ރުފިޔާއަށެވެ.
ރަމަޟާން މަހު އާންމުކޮށް ބޭނުންކުރާ ކާބޯތަކެތީގެ އަގުތައް މަތިނުވެ، އެއްވަރެއްގައި ހިފެހެއްޓުމަށް އެސްޓީއޯއިން މަސައްކަތްކުރަމުންދާކަމަށް އެ ކުންފުނިން މަޢުލޫމާތު ދެއެވެ. އަދި މިއަހަރުގެ ރަމަޟާން މަހަށް ބޭނުންވާ މުދާ ފަސޭހަކަމާއެކު ލިބޭނެ ގޮތް ހަމަޖެއްސުމަށް، ކުރީ އަހަރުތަކެކޭ އެއްފަދައިން މިފަހަރުވެސް ތައްޔާރުވެފައިވާކަމަށް އެސްޓީއޯއިން ބުނެއެވެ.
އެސްޓީއޯއިން އިތުރަށް މަޢުލޫމާތު ދެމުން ބުނީ، މާކެޓްގެ އަގުތަކަށް އަންނަ ބަދަލުތައް ގަވާއިދުން ބަލަމުންގެންގޮސް، އަގު މައްޗަށްދާ ތަކެތި ފާހަގަކޮށް، އެކަމަށް އަވަސް ހައްލެއް ގެނެވޭނެ ކަމަށެވެ. މިގޮތުން، ލުނބޯގެ އިތުރުން ރޯދައަށް ޚާއްސަކޮށްގެން ފިޔާ އަދި ކާށިވެސް ހެޔޮ އަގެއްގައި ވިއްކަމުންދާކަމަށް އެ ކުންފުނިން ހާމަކުރިއެވެ.
އެސްޓީއޯއިން ލުނބޯ ވިއްކާ އަގުތައް:
– ލުނބޯ ކިލޯއެއް: 40 ރުފިޔާ
– ލުނބޯ ފޮށިގަނޑެއް (5 ކިލޯ): 145 ރުފިޔާ
މީގެއިތުރުން، އެސްޓީއޯއިން ކާށްޓެއް 5 ރުފިޔާއަށް ވިއްކަމުންދާއިރު، ބާޒާރުގައި މިވަގުތު ކާށީގެ އަގު 10 ރުފިޔާއާއި 25 ރުފިޔާއާ ދެމެދުގައި ހުރިކަމަށް ފާހަގަކުރެވެއެވެ. އަދި ފިޔާ ކިލޯއެއް އެސްޓީއޯއިން ވިއްކަމުންދަނީ 15 ރުފިޔާއަށެވެ.
ރަމަޟާން މަހަށް ޚާއްސަކޮށްގެން، އެސްޓީއޯއިން ވަނީ ހަތަރު ބާވަތަކަށް ބަހާލައިގެން ކާބޯތަކެތި އެތެރެކުރުމަށް ތައްޔާރުވެފައެވެ. މީގެ ތެރޭގައި އަސާސީ ކާބޯތަކެތި، ތާޒާ ތަރުކާރީއާއި މޭވާ، ތައްޔާރީ ކާނާ، އަދި ކެއްކުމަށް ބޭނުންކުރާ ތަކެތި ހިމެނެއެވެ.
ކިޔުންތެރިންގެ ހިޔާލު