ދިރާގުން ކުރިއަށް ގެންދިޔަ “ވިން އަ ސްޕީޑްބޯޓް” ޕްރޮމޯޝަންގެ ނަސީބުވެރިޔާ ކަމުގައިވާ ގއ. ވިލިނގިލީ، ހުސައިން ފަޔާޒްއަށް ރަސްމީކޮށް ބޯޓު ހަވާލުކޮށްފިއެވެ. މި ރަސްމިއްޔާތު ބޭއްވުނީ އަލް ޝާލީ މެރިން ބޯޓްޔާޑުގައެވެ.
ހުސައިން ފަޔާޒްއާ ހަވާލުކުރެވުނީ އަލް ޝާލީ މެރިން މަޖެލަން 32 ބޯޓާއި، ޔަމަހާގެ 175 ހޯސްޕަވަރުގެ ދެ އައުޓްބޯޑް އިންޖީނެވެ. މި ރަސްމިއްޔާތުގައި ފަޔާޒްގެ އާއިލާގެ އިތުރުން، ދިރާގު، އަލްޝާލީ އަދި އައުޓްބޯޑު އިންޖީނު ސްޕޮންސަރކޮށްދިން އެލިޔާ ކުންފުނީގެ ފަރާތުން ބައިވެރިވިއެވެ.
ޕްރޮމޯޝަންގެ ނަސީބުވެރިޔާ ފަޔާޒް ވިދާޅުވި ގޮތުގައި، މި ޕްރޮމޯޝަންގައި ފުރަތަމަ ބައިވެރިވިއިރު މި އިނާމު ލިބިދާނެކަމަށް ހީނުކުރެވުނު ނަމަވެސް، ހަނގު ދަރިފުޅުގެ ޝައުޤުވެރިކަމާއެކު ބައިވެރިވުމަށް ނިންމެވިއެވެ. އަދި ބޯޓު ލިބުނުކަން އެނގުމުން ފުރަތަމަ ޤަބޫލުކުރަން ދަތިވި ނަމަވެސް، ވަރަށް އުފާވެވަޑައިގަތް ކަމަށް ވިދާޅުވިއެވެ. މީގެއިތުރުން، ދިރާގުން ކަސްޓަމަރުންނަށް މިފަދަ ޕްރޮމޯޝަންތައް ބާއްވައި، އަގުހުރި އިނާމުތައް ހޯދުމުގެ ފުރުޞަތު ފަހިކޮށްދެމުންދާތީ، އެކަމަށްޓަކައި ދިރާގަށް ޝުކުރު އަދާކުރެއްވިއެވެ.
ދިރާގުން ފާހަގަކުރި ގޮތުގައި، ފަޔާޒަކީ ވޭތުވެދިޔަ 16 އަހަރު ވަންދެން މެދުކެނޑުމެއްނެތި ދިރާގުގެ ގިނަ ޚިދުމަތްތައް ބޭނުންކުރަމުންދާ ވަފާތެރި ކަސްޓަމަރެކެވެ.
“ވިން އަ ސްޕީޑްބޯޓް” ޕްރޮމޯޝަނަކީ ދިރާގުގެ ކަސްޓަމަރުންނަށް ތަފާތު، ބޭނުންތެރި އަދި އަގުހުރި އިނާމުތައް ހޯދައިދިނުމުގެ މަޤުޞަދުގައި 2022 ވަނަ އަހަރުގެ ސެޕްޓެމްބަރު 16 އިން ޑިސެމްބަރު 16 އަށް ކުރިއަށްގެންދެވުނު ޕްރޮމޯޝަނެކެވެ. މި ބޯޓަކީ އާއިލާއާއެކު ވަގުތު ހޭދަކުރުމަށާއި މަސްވެރިކަން ފަދަ މުނިފޫހިފިލުވުމުގެ ހަރަކާތްތަކަށް ބޭނުންކުރެވިދާނެ ބޯޓެކެވެ.
ފާހަގަކޮށްލެވޭ ކަމަކީ، ދިރާގުން ވޭތުވެދިޔަ އަހަރުވެސް މިފަދަ ބޮޑު ޕްރޮމޯޝަނެއް ކުރިއަށް ގެންގޮސް، ނަސީބުވެރި ފަރާތަކަށް ޓެސްލާ ކާރެއް ހަދިޔާކޮށްފައިވާކަމެވެ.
ކިޔުންތެރިންގެ ހިޔާލު