އެންޓި-ކޮރަޕްޝަން ކޮމިޝަން (އޭސީސީ) ގެ ނައިބު ރައީސްކަމުގެ މަޤާމަށް އައްޔަނުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައު ނަމެއް ރައު ނަމެއް ރައްޔިތުންގެ މަޖިލީހަށް ހުށަހަޅުއްވައިފިއެވެ.

ރައީސުލްޖުމްހޫރިއްޔާ އިއްޔެ ހުށަހެޅުއްވި އަޙްމަދު ނާޝިދުގެ ނަން އަނބުރާ ގެންދަވައި، މިއަދު އައު ނަމެއްގެ ގޮތުގައި އޭސީސީގެ މެންބަރު ޢަބްދުﷲ ނާޝިދުގެ ނަން ހުށަހަޅުއްވާފައިވެއެވެ. މި ބަދަލު ގެންނެވި ސަބަބު ސާފުކޮށް ބަޔާންކުރައްވާފައި ނުވިނަމަވެސް، މި އައު ހުށަހެޅުން ދިރާސާކޮށް ފާސްކޮށްދެއްވުމަށް ރައީސުލްޖުމްހޫރިއްޔާ އެދިވަޑައިގެންފައިވެއެވެ.

މަޖިލީހުގެ ރިޔާސަތުން ވަނީ މި މައްސަލަ ދިރާސާކުރުމަށްޓަކައި މިނިވަން މުއައްސަސާތަކުގެ ކޮމިޓީއަށް ފޮނުއްވާފައެވެ.

ޢަބްދުﷲ ނާޝިދަކީ އިންޑިއާގެ ރީޖަނަލް އިންސްޓިޓިއުޓް އޮފް އެޑިއުކޭޝަނުން މާސްޓަރ އޮފް އެޑިއުކޭޝަން ޙާޞިލްކުރައްވާފައިވާ ބޭފުޅެކެވެ. އޭނާގެ މަސައްކަތުގެ ތަޖުރިބާގެ ތެރޭގައި އާސަންދަ ކުންފުނީގެ އެކި ޑިޕާޓްމަންޓުތަކުގެ މެނޭޖަރުކަން ހިމެނެއެވެ. ޢަބްދުﷲ ނާޝިދާއި އަޙްމަދު ނާޝިދު އޭސީސީގެ މެންބަރުކަމަށް އައްޔަނުކުރެވިފައިވަނީ މިދިޔަ ޖަނަވަރީ 26 ވަނަ ދުވަހުއެވެ.

މިހާރު އޭސީސީގައި ހިމެނިވަޑައިގަންނަވާ އެހެން މެންބަރުންނަކީ ކޮމިޝަންގެ ރައީސް އާދަމް ޝާމިލް، އަޙްމަދު ނާޝިދު، ޝަޒްނާ ހާޝިމް އަދި ޝިޔާމާ މުޙައްމަދެވެ.