ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މެނޭޖިންގ ޑިރެކްޓަރު ޝިމާދު އިބްރާހީމް ވިދާޅުވެފައިވާ ގޮތުގައި، ރަމަޟާން މަހަށް ބޭނުންވާ މުދާ ފަސޭހަކަމާއެކު ލިބޭނެ އިންތިޒާމު ހަމަޖެއްސުމަށް އެސްޓީއޯއިން ދުރާލާ ތައްޔާރުވަމުން ދެއެވެ.

“އެކްސް” މެދުވެރިކޮށް ޝިމާދު ހިއްސާކުރެއްވި މަޢުލޫމާތުގައި، ބާޒާރުގެ އަގުތައް ދުވަހުން ދުވަހަށް ބަލަމުންދާ ކަމަށާއި، އަގު މައްޗަށް ދިއުމުގެ ފުރުޞަތު އޮތް ބާވަތްތައް ދެނެގަތުމުގެ މަސައްކަތް ކުރަމުންދާ ކަމަށް ފާހަގަކުރައްވާފައިވެއެވެ. މި ގޮތުން، ލުނބޯގެ ފުރަތަމަ ޝިޕްމަންޓް މިހާރު ލިބިފައިވާ ކަމަށްވެސް އޭނާ ވިދާޅުވެފައިވެއެވެ.

ރަމަޟާން މަހާ ގުޅިގެން، އަސާސީ އަދި ޒަރޫރީ ބޭނުންތަކުގެ ހުރިހާ މުދަލެއް އެކަށީގެންވާ އަގެއްގައި ރައްޔިތުންނަށް ފޯރުކޮށްދިނުމަކީ އެސްޓީއޯގެ އަމާޒެކެވެ. ޚާއްޞަކޮށް ރޯދަމަހު އެންމެ ބޭނުންވާ ތަކެތީގެ އަގު ހިފެހެއްޓުމުގައި އެސްޓީއޯގެ ދައުރު ވަރަށް މުހިންމެވެ.

މި ވަގުތު އެސްޓީއޯއިން ވަނީ ހަތަރު ބައިކަށް ބަހާލައިގެން ކާބޯތަކެތި އެތެރެކުރުމުގެ މަސައްކަތް ފަށާފައެވެ. އެއީ:

1. އަސާސީ ކާބޯތަކެތި: ފިޔާ، ބިސް، އަލުވި، ކާށި، އަދި ކަދުރު
2. ތާޒާ ތަރުކާރީ އަދި މޭވާ: ލުނބޯ، އިނގުރު، ލައިމް، ކެރެޓް، އޮރެންޖް، ކެބެޖް، މިރުސް، ފޭރު، ކަރާ، އަނބު، ޕެޝަންފުރުޓް، އަދި ކިއުކަންބާ
3. ޕްރޮސެސްޑް ކާނާ: ނެސްލޭ ކުރީމް، ކޮކޯ ޕައުޑަރ، ބޭކެޓް ބީންސް، އަދި ގެރިކިރު ދަޅު
4. ކެއްކުމަށް ބޭނުންކުރާ ތަކެތި: ސަންފްލާވަރ އޮއިލް، ވެޖިޓަބަލް އޮއިލް، އަދި ބާސްމަތި ހަނޑޫ

އެސްޓީއޯގެ މައިގަނޑު އަމާޒަކީ ޒަރޫރީ ބޭނުންތަކަށް ބޭނުންވާ މުދާ ފަސޭހަކަމާއެކު ލިބޭނެ އިންތިޒާމު ހަމަޖައްސައިދިނުމެވެ. މި މަސައްކަތުގެ ތެރެއިން، ރަމަޟާން މަހު ރައްޔިތުންނަށް ބޭނުންވާ އަސާސީ ތަކެތި އެކަށީގެންވާ އަގެއްގައި ލިބޭނެކަން ކަށަވަރުކުރުމަށް އެސްޓީއޯއިން މަސައްކަތްކުރަމުން ގެންދާކަން ފާހަގަކުރެވެއެވެ.