އިލެކްޝަންސް ކޮމިޝަނުން ނެޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ (އެންސީއައިޓީ) އާއެކު ސިޔާސީ ޕާޓީތަކުގެ ދަފްތަރުގައި އީ-ފާސް މެދުވެރިކޮށް ރަޖިސްޓަރީވެވޭނެ ނިޒާމެއް ޤާއިމުކުރުމާ ބެހޭގޮތުން މަޝްވަރާކޮށްފިއެވެ.
އިލެކްޝަންސް ކޮމިޝަނުގެ މެންބަރު ޙަސަން ޒަކަރިއްޔާ ވިދާޅުވިގޮތުގައި، މި މަޝްވަރާތަކުގައި އީ-ފާސް ބޭނުންކޮށްގެން ޕާޓީތަކުގައި ރަޖިސްޓަރީވުމުން ޕާޓީތަކަށާއި އާންމުންނަށް ދިމާވެދާނެ ގޮންޖެހުންތަކާ ބެހޭގޮތުން ވަނީ މަޝްވަރާކުރެވިފައެވެ. އަދި އީ-ފާސް މެދުވެރިކޮށް ޕާޓީތަކުގައި ރަޖިސްޓަރީވެވޭނެ ޕޯޓަލެއް މިހާރު ވަނީ ޑިޒައިންކުރެވިފައެވެ.
ސިޔާސީ ޕާޓީތަކަށް މެންބަރުން ދަފްތަރުކުރުމުގައި އީ-ފާސް ބޭނުންކުރުމާ ގުޅޭޮތުން، ނެޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީގެ އިސްބޭފުޅުންނާއެކު، ކޮމިޝަނުން މިއަދު ބޭއްވި ބައްދަލުވުމުގެ ތެރެއިން @ncitmv pic.twitter.com/MLWnQKOFcN
— Elections Commission (@ElectionsMv) February 2, 2025
އިލެކްޝަންސް ކޮމިޝަނުން ނިންމަވާފައިވަނީ މި މަހުގެ 15 ވަނަ ދުވަހުން ފެށިގެން ސަރުކާރުގެ ޑިޖިޓަލް އައިޑެންޓިޓީ ނިޒާމު، އީ-ފާސް މެދުވެރިކޮށް ސިޔާސީ ޕާޓީތަކުގެ ދަފްތަރުގައި ރަޖިސްޓަރީވުމަށް އެދި ހުށަހެޅޭނެ ގޮތް ހަމަޖެއްސުމަށެވެ. މިއާ ގުޅިގެން، މިދިޔަ މަހުގެ 30 ވަނަ ދުވަހުން ފެށިގެން ޕާޓީތަކަށް ވަނުމަށް އެދި ހުށަހަޅާ ކަރުދާސް ފޯމު ބަލައިގަތުން ވަނީ ހުއްޓާލާފައެވެ.
މި ބަދަލު ގެނައުމުގެ މަޤްޞަދަކީ މީހުންނަށް ނޭނގި އެކި ޕާޓީތަކަށް ވައްދާ މައްސަލަ ޙައްލުކުރުމާއި، ޕާޓީތަކުގެ ދަފްތަރުގެ ޞައްޙަކަން އިތުރަށް ކަށަވަރުކުރުމެވެ. މިއީ ކޮންމެ އަހަރެއްގެވެސް ނިމޭ ހިސާބާ ދިމާކޮށް ޕާޓީތަކަށް މެންބަރުން އިތުރުކުރުމަށް ހިންގާ ހަރަކާތްތަކުގެ ތެރެއިން އުފެދޭ މައްސަލަތަކަށް ދާއިމީ ޙައްލެއް ހޯދުމަށް އަޅާ މުހިންމު ފިޔަވަޅެކެވެ.
ކިޔުންތެރިންގެ ހިޔާލު