ދިވެހިރާއްޖެއާއި އިންޑިއާއާ ދެމެދު އޮތް ދެފުށް ފެންނަ ގުޅުން އިތުރަށް ހަރުދަނާކޮށް، ދެ ޤައުމަށް މަންފާކުރަނިވި ދާއިރާތަކުގައި އެއްބާރުލުން ދެމެހެއްޓުމަށް ދިވެހި ސަރުކާރުން އަބަދުވެސް މަސައްކަތްކުރާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ދެއްވައިފިއެވެ.

އިންޑިއާގެ 75 ވަނަ ޖުމްހޫރީ ދުވަހުގެ މުނާސަބަތުގައި އެ ޤައުމުގެ ރައީސް ޑްރޫޕަދީ މުރްމޫ އަދި ބޮޑުވަޒީރު ނަރެންދުރަ މޯދީއަށް ފޮނުއްވި ތަހުނިޔާގެ ސިޓީގައި ރައީސް މުޢިއްޒު ފާހަގަކުރެއްވި ގޮތުގައި، އިންޑިއާއާއެކު ޤާއިމުވެފައިވާ ބަދަހި ގުޅުން ދެމެހެއްޓުމަށް ދިވެހިރާއްޖެ ދެމިހުންނާނީ ސާބިތުކަމާއެކުގައެވެ. މީގެއިތުރުން، ދެ ޤައުމުގެ ދެމެދުގައި އޮތީ އިތުބާރާއި އިޙްތިރާމް އަދި އެއްގޮތް ވިސްނުމެއްގެ މައްޗަށް ބިނާވެފައިވާ ގުޅުމެއްކަންވެސް ރައީސް އެ ސިޓީގައި ފާހަގަކުރެއްވިއެވެ.

އިންޑިއާގެ 75 ވަނަ ޖުމްހޫރީ ދުވަސް އެ ޤައުމުގައި މިއަދު ފާހަގަކުރަމުން ގެންދެއެވެ.