އދ. މާމިގިލީގައި ފުލުހުންގެ އައު މަރުކަޒެއް ޤާއިމުކުރުމުގެ މަސައްކަތް ފެށިއްޖެއެވެ.

އަރިއަތޮޅު ދެކުނުބުރީ މާމިގިލީގައި ފުލުހުންގެ އައު މަރުކަޒެއް ޤާއިމުކުރުމަށްޓަކައި، ދިވެހި ފުލުހުންގެ ޚިދުމަތާއި ވިލާ ފައުންޑޭޝަނާ ދެމެދު އެއްބަސްވުމެއްގައި ސޮއިކުރެވި، މަރުކަޒުގެ ބިންގާ އެޅުމުގެ ރަސްމިއްޔާތު މިއަދު ބޭއްވިއްޖެއެވެ.

މި މުހިންމު ރަސްމިއްޔާތުގައި، ދިވެހި ފުލުހުންގެ ޚިދުމަތުގެ ފަރާތުން ކޮމިޝަނަރ އޮފް ޕޮލިސް އަލްފާޟިލް ޢަލީ ޝުޖާޢު އެއްބަސްވުމުގައި ސޮއިކުރައްވައި، މަރުކަޒުގެ ބިންގާ އަޅުއްވައިދެއްވިއެވެ. ވިލާ ފައުންޑޭޝަންގެ ފަރާތުން އެއްބަސްވުމުގައި ސޮއިކުރެއްވީ ފައުންޑޭޝަންގެ ޗެއަރމަން އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު އަލްފާޟިލް ޤާސިމް އިބްރާހީމެވެ.

މި މަޝްރޫޢުގެ ދަށުން ޤާއިމުކުރެވޭ މަރުކަޒުގައި އިދާރީ އޮފީހުގެ އިތުރުން، ފުލުހުންގެ ދިރިއުޅުމުގެ ޚާއްޞަ އިންތިޒާމުތަކާއި ކެއުމުގެ ވަސީލަތްތައް ހިމެނޭނެއެވެ. މި މަރުކަޒު ނިންމައި ފުލުހުންނާ ހަވާލުކުރުމަށް ހަމަޖެހިފައިވަނީ މިއަދުން ފެށިގެން 12 މަސްދުވަހުގެ ތެރޭގައެވެ.

މި މަރުކަޒަކީ ވިލާ ފައުންޑޭޝަންގެ ޗެއަރމަން އަލްފާޟިލް ޤާސިމް އިބްރާހީމްގެ ހިލޭ އެހީގެ ދަށުން ތަރައްޤީކުރެވޭ މުހިންމު ވަސީލަތެކެވެ. މި މަރުކަޒު ޤާއިމުކުރެވުމުން، މާމިގިލީގެ ރައްޔިތުންނަށް ފުލުހުންގެ ޚިދުމަތް އިތުރަށް ފުޅާވެ، ރަށުގެ ސަލާމަތާއި ރައްކައްކާތެރިކަން އިތުރުވެގެންދާނެ ކަމަށް އުންމީދުކުރެވެއެވެ.