ގދ. ތިނަދުއަށް ގާނޫނާ ޚިލާފަށް ސިޓީއެއްގެ ދަރަޖަ ދިން މައްސަލައިގެ ތަހުގީގު ފުލުހުން ފަށައިފިއެވެ.

އެ މައްސަލަ ތަހުގީގު ކުރުމަށް ފުލުހުންގެ ޚާއްސަ ތަހުގީގު ޓީމެއް މިހާރު އަންނަނީ ތިނަދޫގައި ހަރަކާތްތެރިވަމުންނެވެ.

އެ މައްސަލާގައި އެންމެ ބޮޑަށް ތުހުމަތު ކުރެވެނީ ތިނަދޫ ސިޓީގެ މޭޔަރު ސައުދު އަލީ އަށެވެ. އެ މައްސަލައާ ގުޅިގެން ތިނަދޫގެ ކައުންސިލަރުންނާއި ކައުންސިލް އިދާރާގެ މުވައްޒަފުންނާ ސުވާލުކޮށް ތަހުގީގު ޓީމުން އަންނަނީ ބަޔާންތައް ނަގަމުންނެވެ.

ތިނަދުއަށް ސިޓީއެއްގެ ދަރަޖަދިނުމަށް އެ ރަށު ކައުންސިލުން ހުށަހެޅީ އެ ރަށު ރަށްވެހީންގެ ދަފްތަރުގައި މަރުވެފައި ތިބި މީހުންނާއި އެ އަތޮޅުގެ އެކި ރަށްރަށުގެ ރަޖިސްޓްރީގައި ތިބި މީހުން ގަވާއިދާ ޚިލާފަށް ޖައްސައިގެންނެވެ.

ތިނަދޫގެ އާބާދީއަކީ ގާތްގަނޑަކަށް 7000 މީހުންނެވެ. އެކަމަކު ތިނަދޫ ކައުންސިލުން ހުށަހެޅި ލިސްޓްގައި 10000 މީހުން ތިއްބެވެ.

ތިނަދުއަށް ދީފައިވާ ސިޓީއެއްގެ ދަރަޖަ ބާތިލްކުރަން ކޯޓަށް ވެސް ވަނީ މައްސަލަ ހުށަހަޅާފައެވެ.