ނ. އަތޮޅު މަގޫދޫގައި ދެ މުހިންމު މަޝްރޫޢެއްގެ އަމަލީ މަސައްކަތް ފެށުމަށްޓަކައި، އެމްޓީސީސީން ޕްރޮޖެކްޓް ސައިޓު މޮބިލައިޒް ކުރުމުގެ މަސައްކަތް ވަނީ ފަށައިފައެވެ. މި ދެ މަޝްރޫޢުގެ ތެރޭގައި ހިމެނެނީ ފިޓްނެސް އެންޑް ރެކްރިއޭޝަން ސެންޓަރެއް އަދި އައުޓްޑޯ ޖިމެއް ޤާއިމުކުރުމެވެ.

ރާއްޖޭގެ އެކި ކަންކޮޅުތަކުގައި ރައްޔިތުންނަށް ނުހަނު މުހިންމު އަދި ޒަރޫރީ ގިނަ މަޝްރޫޢުތަކެއް ހުއްޓިފައިވުމާ ގުޅިގެން، ރައްޔިތުންގެ ކަންބޮޑުވުންތައް އިތުރުވެފައިވާތީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމާއި ޚާއްޞަ އިރުޝާދުފުޅުގެ ދަށުން، މިފަދަ މަޝްރޫޢުތަކުގެ މަސައްކަތް ނިންމުމުގެ ޒިންމާ ވަނީ އެމްޓީސީސީއާ ހަވާލުކުރެވިފައެވެ.

އެމްޓީސީސީން ނެރުނު ބަޔާނެއްގައި ފާހަގަކޮށްފައިވާ ގޮތުގައި، ގާތްގަނޑަކަށް 350 މީހުންގެ އާބާދީއެއް ދިރިއުޅޭ މަގޫދޫގައި މި ފެށިގެންދާ މަޝްރޫޢުތަކުގެ މަސައްކަތް ފުރިހަމަވުމުން، އެރަށުގެ ރައްޔިތުންނަށް އުމްރާނީ އަދި އިޖުތިމާޢީ ގޮތުން ގިނަގުނަ މަންފާތަކަކާއި ފަސޭހަތަކެއް ލިބިގެންދާނެއެވެ.

ފާއިތުވި 44 އަހަރުގެ ތެރޭގައި އެމްޓީސީސީން ވަނީ ދިވެހިރާއްޖޭގެ އެކި ކަންކޮޅުތަކުގައި ގިނަ މަޝްރޫޢުތަކެއް ކާމިޔާބުކަމާއެކު ނިންމާފައެވެ. 1980 ވަނަ އަހަރު އެމްޓީސީސީ އުފެދުނީއްސުރެ، މި ކުންފުނިން ދަނީ ރާއްޖޭގެ އުމްރާނީ ތަރައްޤީއާއި އިޖުތިމާޢީ ވަސީލަތްތައް ބިނާކުރުމުގެ ދާއިރާއިން އެތަކެއް މުހިންމު މަސައްކަތްތަކެއް ކުރަމުންނެވެ.