ކުރެވިފައިވާ ކުށްތަކަށް ތައުބާވުމަކީ ތަޤުވާވެރިކަމުގެ މަތީގައި ދެމިހުރުމަށް މަގުފަހިވާނޭ ކަމެއްކަމަށް މިއަދުގެ ހުކުރު ޚުތުބާގައި ބުނެފިއެވެ. ރާއްޖޭގެ އެކިކަންކޮޅުތަކުގައި މިއަދު އިއްވި ޚުތުބާ ބިނާކޮށްފައިވަނީ ”ތަޤުވާވެރިވުމާއި ތައުބާގެ މައްސަރު“ މި މައުޟޫއުގެ މައްޗަށެވެ.
މިއަދުގެ ޚުތުބާގައި ބަޔާންކޮށްފައިވާ ގޮތުގައި، މާތް اللهُ ސުބުޙާނަހޫ ވަތަޢާލާ ވަނީ މައްސަރުތަކުގެ ތެރެއިން ރަމަޟާން މަސް އެތައް ގޮތަކުން މާތްކުރައްވައި މަތިވެރިކުރައްވާފައެވެ. އޭގެ ތެރޭގައި މި ބަރަކާތްތެރި މައްސަރުގައި ކީރިތި ޤުރްއާން ބާވައިލެއްވުމާއި، ރޯދަ ހިފުމުގެ މަތިވެރި އަޅުކަން ފަރުޟުކުރެއްވުމުގެ އިތުރުން، ހެޔޮ ކަންކަމަށް މަތިވެރި ޖަޒާދެއްވުން ހިމެނޭކަން ޚުތުބާގައި ފާހަގަކުރިއެވެ.
ތައުބާވުމުގެ މުހިންމުކަމުގެ މައްޗަށް އަލިއަޅުވާލަމުން ޚުތުބާގައި ބުނީ، ތައުބާވުމަކީ ކުރެވިފައިވާ އެންމެހައި ފާފަތަކުން އެއްކިބާވެ، އެކަމާ މެދު ދެރަވެ ހިތާމަކޮށް، އަލުން އެ ފާފައަށް އަރައިނުގަތުމަށް ޢަޒުމު ކަނޑައެޅުން ކަމަށެވެ. އަދި މީހެއްގެ ޙައްޤަކަށް އަރައިގަނެވިފައިވާ ނަމަ، އެ ޙައްޤު އަދާކުރުމާއެކު އިޚުލާޞްތެރިކަމާއެކު ފާފަ ފުއްސެވުން އެދި ދުޢާކުރުމަކީ ތައުބާ ފުރިހަމަވުމުގެ ޝަރުޠެއް ކަމަށްވެސް ބުންޏެވެ.
ޚުތުބާގައި އިތުރަށް ބަޔާންކުރި ގޮތުގައި، ތައުބާވުމަކީ ތަޤުވާވެރިކަމުގެ މަތީގައި ދެމިހުރުމަށް މަގުފަހިވާނޭ ކަމެކެވެ. މާތް ނަބިއްޔާ ﷺ އަކީ އެކަލޭގެފާނުގެ އިސްވެދިޔަ ފާފަޔާއި ފަހުން އަންނާން އޮތް ފާފަ ފުއްސަވައިދެއްވާފައިވާ ބޭކަލަކަށް ވީ ހިނދުވެސް، ދުވާލަކު ހަތްދިހަ ފަހަރަށް ވުރެ ގިނައިން ތައުބާވެވަޑައިގަންނަވާ ކަމަށް ޙަދީޘް ކުރައްވާފައިވާކަން ޚުތުބާގައި ހަނދާންކޮށްދިނެވެ. އަދި ތަޤުވާވެރިކަމަކީ ހިތާ ގުޅިފައިވާ ކަމެއްކަމާއި، ރޯދަ ފަރުޟުކުރެއްވުމުގެ މައިގަނޑު ޙިކުމަތަކީވެސް ތަޤުވާވެރިވުން ކަމަށް ޚުތުބާގައި ބުންޏެވެ.
މީގެ އިތުރުން، ރަމަޟާން މަހުގެ ޙުރުމަތް ހިފެހެއްޓުމަށްވެސް މިއަދުގެ ޚުތުބާގައި ވަނީ ބާރުއަޅާފައެވެ. ވަކީން ޚާއްޞަކޮށް، މީހުން ދިރިއުޅޭ ރަށްތަކުގައި ފަތުރުވެރީންނަށް ޚިދުމަތްދޭ ފަރާތްތަކުން، އާންމުންގެ ކުރިމަތީގައި ހާމަކަން ބޮޑު ގޮތެއްގައި ކެއިންބުއިމުގެ ޚިދުމަތް ނުދިނުމަށް ވަނީ އިލްތިމާސްކޮށްފައެވެ. އަދި ޝަރުޢީ ޢުޒުރެއްގެ ސަބަބުން ރޯދަ ދޫކޮށްލާ މީހުންވެސް، މި މަތިވެރި މަހުގެ ޙުރުމަތަށް ރައްކާތެރިވެ، އާންމު ތަންތަނުގައި ކެއިންބުއިމުން ދުރުހެލިވުމަށް ޚުތުބާގައި ނަޞޭޙަތްތެރިވިއެވެ.
ކިޔުންތެރިންގެ ހިޔާލު